Nang-scam na-entrap

CEBU, Philippines — Usa ka lalaking gipasanginlang nang-scam og baligya’g baratong krudo gidakop sa mga operatiba sa National Bureau of Investigation Central Visayas Regional Office sa entrapment operation sa sulod sa usa ka mall sa Mandaue City adtong Lunes, Agosto 3.

Sumala pa sa report sa One Balita Bai sa One PH, ang suspek nga taga Liloan, Cebu  nadakpan sa usa ka mall nga nahimutang sa A.S. Fortuna Street  sa maong siyudad human niya gidawat ang marked money.

Ang pagdakop sa iya nagsugod ni tungod sa reklamo sa usa ka negosyante nga nireklamong nailad siya niini pagbayad og P5.3 milyones adtong Hulyo 26 para mopalit og 100,000 ka litrong krudo sa kantidad nga tag P53 kada litro.

Sumala pa sa NBI, dihang gipangitaan na sa biktima ang suspek sa napalit niining krudo, wala kini nahatag.

Gisultihan lang siya matud pa nga nabalhin na ang krudo sa laing kompanya. Tungod kay wala nay klaro kung mahatag sa iya ang krudo, nidangop na kini sa NBI.

Kasong estafa ubos sa Article 315, Paragraph 2(e) sa Revised Penal Code ug Illegal Trading in Petroleum ubos sa Section 2(a) sa Batas Pambansa Blg. 33, as amended ang ipasaka sa NBI batok sa suspek.- IBM BANAT NEWS