Tulo ka PUJ nigamit og clone nga license plates

CEBU, Philippines — Tulo ka public utility jeepneys (PUJs) ang nadakpan atol sa operasyon sa Traffic Enforcement Agency of Mandaue (TEAM) tungod sa giingong paggamit og cloned o double nga license plates.

Kagahapon si Hyll Retuya, pangulo sa TEAM nibutyag nga nakadawat ang ahensiya og report kalabot sa mga sakyanan nga giingong nag-operate sa Mandaue gamit ang duplicate nga license plates.

Kadaghanan sa mga gi-report mao ang traditional PUJ ilabi na ang mga multicab nga nagbiyahe sa rota nga Compostela-Liloan paingon sa Mandaue.

Sulod sa duha ka semana nga operasyon, tulo ka units ang nadakpan ug kasamtangang gipabilin sa impounding area sa TEAM.

Matud ni Retuya nga giisyuhan og Temporary Operator’s Permits (TOPs) ang mga nadakpan nga PUJ ug ang mga kaso gi-report ngadto sa Land Transportation Franchising and Regulatory Board (LTFRB).

Gipahigayon ang operasyon ubos sa koordinasyon sa Land Transportation Office (LTO) ug sa Land Transportation Franchising and Regulatory Board.

Si Retuya nagkanayon nga usa ka lehitimong license plate ug usa ka prangkisa ang gigamit sa daghang sakyanan.

Gibutyag ni Retuya nga adunay mga drayber ang wala makapresentar og mga dokumento samtang ang uban nakapakita og mga dokumento nga wala motakdo sa detalye sa sakyanan.

Ug sa pag-verify sa LTFRB nasuta usab nga expired na ang mga dokumento sa tulo ka nadakpang sakyanan.

Ang mga drayber sa nahisgutang mga sakyanan nangangkon nga wala sila kahibalo sa maong sitwasyon.

Dugang ni Retuya nga magpadayon ang TEAM sa koordinasyon uban sa LTO ug LTFRB ug i-forward ang mga report kabahin sa nadakpang mga sakyanan ngadto sa ahensiya’ng hingtungdan alang sa dugang nga aksyon. BDB BANAT NEWS