LTO niisyu og NTE sa duha ka employee-driver

CEBU, Philippines — Ang Land Transportation Office (LTO)-7 niisyu og Notices to Explain (NTEs) batok sa mga employee-driver sa duha ka sakyanan nga giingong nalambigit og kalapasan sa balaod sa trapiko diin nikatap kini sa social media.

Ang NTE nga gipirmahan ni Acting Regional Law Enforcement Service Chief Geralgin Balatucan nagmando sa mga drayber nga mosumite sa ilang sinulat nga tubag sulod sa lima ka adlaw gikan sa pagdawat sa pahibalo ug ipatin-aw nganong dili sila kasohan og administratibo.

Samtang nagpadayon ang imbestigasyon, gipahunong una sa LTO-7 ang duha ka drayber sa ilang katungdanan sa pag-drive.

Base sa imbestigasyon, giingong nakita ang duha ka sakyanan nga niliko paingon sa wala ngadto sa Palma Street bisan adunay traffic sign nga nagdili.

 Nabantayan sa LTO-7 ang insidente human ang video sa giingong kalapasan gi-post sa social media niadtong Agosto 1, 2026.

Gitumbok sa LTO-7 nga dili tugotan ang bisan unsa nga traffic violation ug gilaoman nga ang ilang mga kawani magpakita og mas taas nga lebel sa disiplina, mosunod sa mga balaod paglikay sa disgrasya.

Ug isip mga tigpatuman sa balaod ug mga alagad sa publiko gilaoman sila’ng mahimong maayong ehemplo pinaagi sa kanunay nga pagtuman sa mga lagda sa trapiko.

Matud sa ahensiya nga kabahin ang pag-isyu sa NTE sa padayon nila’ng paningkamot sa paglig-on sa disiplina sa kadalanan, pagpalig-on sa accountability ug pagdasig sa responsableng pagmaneho sa Central Visayas.

Gipahinumdoman usab sa LTO-7 ang mga motorista nga ang mga traffic violation nga adunay kasaligan nga ebidensya, lakip ang mga video sa social media mahimong gamiton nga basehan sa administratibong kaso ubos sa kasamtangang mga balaod ug regulasyon. BDB BANAT NEWS