P6.8M shabu nasakmit atol sa buy-bust operation

CEBU, Philippines — Nikabat ngadto sa P6.8 miyones ang kantidad sa shabu nga nakompiska atol sa buy-bust operation nga gipahigayon sa Philippine Drug Enforcement Agency-7 ug Cebu City Police Office Station 9 batok sa usa ka drayber sa habal-habal diha sa Barangay Guadalupe, Cebu City niadtong Martes sa hapon. Gipaila ni PDEA-7 Director Joel Plaza ang suspetsado pinaagi sa alyas nga “Ryan,” 25 anyos, ulitawo, residente sa Barangay Guadalupe. Nasakmit gikan sa suspetsado ang 40 ka paketeng shabu nga moabot ngadto sa usa ka kilo ang gibug-aton ug nikabat ngadto sa P6.8 milyones ang kinatibuk-ang balor niini. Lakip sa nasakmit gikan sa suspetsado ang buy-bust money, usa ka cellular phone ug uban pa’ng mga butang nga gituohang gigamit sa ilegal nga kalihokan sa suspetsado. Ang suspetsado ubos karon sa  kustodiya sa PDEA-7 sa Barangay Lahug niining siyudad.  (BANAT NEWS)