Ekipo sa solar ug electrical training gihatag sa tunghaan

CEBU, Philippines — Gipalig-on sa Meridian Power Inc. (MPI), usa ka subsidiary sa Vivant Energy, ug Vivant Foundation Inc. (VFI) ang kahigayunan sa mga estudyante sa pagkat-on sa electrical ug renewable energy pinaagi sa paghatag og Electrical Installation and Maintenance (EIM) ug solar training equipment ngadto sa Don Carlos A. Gothong Memorial National High School sa Cebu City.

Kapin sa 4,000 ka estudyante sa maong eskwelahan ang makabenepisyo sa proyekto, nga naglakip usab sa pagbag-o sa EIM laboratory ug pagbansay sa mga magtutudlo sa Solar Photovoltaic (PV) Systems.

Tungod sa maong kalamboan, makahimo na ang eskwelahan sa pagtanyag og duha ka Technical Education and Skills Development Authority (TESDA) National Certification courses sama sa Electrical Installation and Maintenance ug Solar PV Systems Installation nga usa ka talagsaon nga oportunidad alang sa pampublikong mga eskwelahan.

Kabahin kini sa Technical-Vocational component sa Project Liadlaw, usa ka programa sa Vivant Foundation nga nakatabang na sa 15 ka eskwelahan sukad kini gilusad niadtong 2017.

Ang kurikulum sa proyekto hiniusang gihimo sa mga inhenyero sa Vivant, TESDA ug Department of Education aron maandam ang mga estudyante sa nag-uswag nga teknolohiya sa sektor sa enerhiya.

Matod ni VFI Executive Director Shem Jose W. Garcia sa usa ka press statement nga importante alang sa ilang kompaniya nga maandam ang sunod nga henerasyon pinaagi sa pagtudlo sa pinakabag-ong kahibalo ug kahanas sa industriya sa enerhiya.

Samtang, si MPI Vice President Bienvenido C. Saniel III miingon nga ang donasyon maghatag og praktikal ug mapuslanong kahanas sa mga estudyante ilabina sa electrical ug solar installation, nga dako og panginahanglan sa umaabot.

Ang turnover ceremony gipangulohan nila Garcia ug Saniel uban ni Dr. Nimfa D. Bongo, Schools Division Superintendent sa DepEd Cebu City Division, ug ni Barangay San Nicolas Proper Chairman Clifford Jude Niñal.

Nagpasalamat usab si Charlie L. Salve ang School Principal sa Don Carlos A. Gothong Memorial National High School sa suporta sa Vivant Foundation ug Meridian Power, nga iyang gihulagway nga dakong tabang sa pagpalambo sa kalidad sa edukasyon sa ilang eskwelahan.

Sumala sa Vivant Foundation, padayon nilang palapdan ang Project Liadlaw ngadto sa daghang eskwelahan sa tibuok nasud aron mas daghang batan-on ang mabansay sa electrical ug renewable energy technologies isip pagpangandam sa nag-uswag nga panginahanglan sa industriya sa enerhiya. (BANAT NEWS)