Na-adik sa scatter nangawat

CEBU, Philippines — Giingong tungod sa pagkaadik sa online gambling nga “scatter,” usa ka 26-anyos nga lalaki ang nasikop human maaktohan sa pagpangawat og panabong nga manok sa iyang giabangan nga balay diha sa Sitio Laray, Barangay Mabolo, Cebu City, sa kaadlawon niadtong Sabado, Agosto 1.

Ang nadakpan mao si alyas Saud, 26, walay trabaho, ug temporaryong nag-abang sa maong lugar.

Ang biktima mao si alyas Rogelio, 2 anyos, residente sa Sitio Laray, Barangay Mabolo.

Base sa report sa Mabolo Police Station (PS-4), alas 4:30 sa kaadlawon dihang namatikdan sa biktima ang kadudahang lihok suspek duol sa iyang tangkal.  Sa iyang pagsusi, naabtan niya ang suspek nga nagkupot na sa usa ka panabong nga manok nga gibanabanaang nagkantidad og ?1,500.

Iya  kining gidakop pinaagi sa citizen's arrest ug gidala sa Mabolo Police Station alang sa hustong dokumentasyon ug pagproseso sa kaso. Atol sa imbestigasyon, miangkon ang suspek sa pagpangawat ug nangayo og pasaylo sa biktima.

Matud pa niya, naadik siya sa online gambling, ilabina sa "scatter," ug nahutdan na siya og kuwarta aron ipusta.

Tungod niini, iyang giplanong ibaligya ang gikawat nga manok aron makapadayon sa pagsugal. Bisan pa sa iyang pag-angkon ug paghangyo og pasaylo, wala modawat ang biktima.

Nagduda usab kini nga ang suspek posible usab nga may kalabutan sa pagkawala sa tulo pa ka panabong nga manok sa miaging semana.

Giingon sa biktima nga wala niya damha nga kawaton sa iyang mismo'ng boarder, nga iyang gitagad ug gisaligan.

Narekober sa kapulisan ang gikawat nga panabong nga manok ug naibalik kini sa tag-iya. (BANAT NEWS)