SC: Lapu-LapuCity pabiling tag-iya sa donated lot

CEBU, Philippines —  Gipalig-on sa Korte Suprema ang pagpanag-iya sa Lapu-Lapu City Government sa usa ka luna nga gidonar alang sa katuyoan sa edukasyon human isalikway ang petisyon sa Mactan-Cebu International Airport Authority (MCIAA) nga nagtinguha sa pagbali sa mga desisyon sa lower court.

Sa 10-panid nga desisyon nga gipagawas niadtong Hulyo 13, gipamatud-an sa First Division sa Korte Suprema ang desisyon sa Court of Appeals niadtong 2018 ug ang resolusyon niini niadtong 2020, nga nagdeklarar nga balido ug nagpadayon ang Deed of Donation sa Lot No. 4726-A. Gideklarar usab sa Korte Suprema nga ang Lapu-Lapu City mao ang lehitimong tag-iya sa maong luna.

Base sa rekord sa kaso, niadtong 1935 gidonar sa magtiayon nga sila Marcos ug Basilisa Seno ang Lot No. 4726-A ngadto sa Lapu-Lapu City ubos sa kondisyon nga kini gamiton “eksklusibo ug hangtod sa hangtod alang sa katuyoan sa eskwelahan.”

Gitukod sa maong luna ang Ibo Elementary School apan giguba ug gibalhin sa laing lugar tungod sa nagkadaghang estudyante.

Niadtong 1958, pipila sa mga manununod sa pamilya Seno ang naghimo og extrajudicial settlement ug deed of sale nga naglangkob sa tibuok Lot No. 4726, lakip ang Lot No. 4726-A, pabor sa MCIAA.

Nangatarungan usab sila nga mibalik kanila ang pagpanag-iya sa yuta human mapakyas ang siyudad sa pagtuman sa kondisyon sa donasyon nga gamiton ang luna alang sa eskwelahan.

Sa laing bahin, mipadayag ang MCIAA nga napapas ang donasyon tungod kay wala na gigamit sa siyudad ang luna alang sa katuyoan sa eskwelahan.

Apan sa desisyon nga gisulat ni Associate Justice Ramon Paul L. Hernando, gipatin-aw sa Korte nga aron mapapas ang usa ka donasyon tungod sa paglapas sa kondisyon, kinahanglan adunay substantial ug fundamental nga paglapas, dili lamang gamay o temporaryong kakulang sa pagtuman.

Matud pa sa Korte, walay ebidensya nga gibiyaan sa Lapu-Lapu City ang luna o gisalikway ang tinguha sa mga donor nga kini gamiton alang sa edukasyon.

Giingon sa Korte nga ang pagguba ug pagbalhin sa Ibo Elementary School gihimo tungod sa panginahanglan nga mapalapdan ang pasilidad alang sa nagkadaghang estudyante ug dili kini nagpasabot nga gibiyaan ang katuyoan sa donasyon.

Gipunting usab sa Korte nga padayon nga gipakita sa Lapu-Lapu City ang intensyon niini nga gamiton gihapon ang maong luna alang sa mga katuyoan nga may kalabutan sa edukasyon.

Dugang pa, namatikdan sa Korte nga ang kasamtangang kawalay kahigayunan sa siyudad sa paggamit sa luna alang sa eskwelahan tungod, sa usa ka bahin nga giokopar ug gigamit sa MCIAA.

Matud pa sa Korte, responsibilidad sa Lapu-Lapu City ang pagsugod sa hustong legal nga proseso aron mabawi ang posesyon sa Lot No. 4726-A aron matuman niini ang kondisyon sa donasyon.

Tungod kay walay balidong pagbawi sa donasyon, giingon sa Korte nga walay pagbalik sa pagpanag-iya ngadto sa mga manununod. Busa, wala usab makakuha og mas lig-on nga katungod ang MCIAA pinaagi sa extrajudicial settlement ug sale. (BANAT NEWS)