Walay pulos ang unang baha

Gibana-bana nga ang uwan nga mibundak sa dakbayan sa Sugbo niadtong Hulyo 30, 2026 susama kadaghan sa 9 ka Olympic size nga swimming pools hinungdan nga misuyla ang tubig sa mga drainage system nga miresulta sa pagbaha sa daghan’g mga komunidad sa syudad.  Nakahasol na pag-ayo sa mga lumolupyo ang sige’ng pagbaha.  Kon dili mahatagan og tukmang solusyon, padayon gayod kining masinati sa dakbayan sa Sugbo bisan sa diyotay’ng ulan lamang.  Morag tinuod ang panahom nga, “Itugot sa Ginoo ang kanunay’g pagbahâ kay nakita man Niya nga walay kapuslanan ang unang pagbahâ sa panahon ni Noah.”  Madahaan!

Dili igsapayan ang buhis

Adunay bag-ong balaodnon nga gipasaka sa senado nga gipangamahanan ni Senador Francis “Kiko” Pangilinan, nga nagtinguha nga patas-an ang kantidad sa income nga mahimong exempt sa bulohisan ngadto sa P350,000 matag tuig.  Tuyo sa maong balaodnon nga modako ang take home pay sa mga trabahante’ng Filipino.  Dako og tabang ang maong balaodnon sa katawhan kon ugaling ma-aprobahan. Apan komento sa akong amigo, “Dili man igsapayan sa katawhan ang dakong buhis basta gamiton lang sa kaayohan sa katawhan og dili kawaton sa mga kanahan.”  Muleeng!

Kwarta ang hinungdan

Sumala ni PNP Chief PGen. Jose Melencio Nartatez, Jr., ilang nasayran nga ang motibo sa pagpatay sa political blogger nga si Alicia Lipata nga naila usab sa ngalan nga Mima Alicia, mao ang P8 million nga utang niini ingon man mga personal nga kasungian tali kaniya ug sa mastermind sa pagpatay kaniya.  Barato na gyud karon ang kinabuhi sa tawo kay bisan bugti lang sa diyotay’ng kantidad, mohunos na ang tawo sa kinabuhi sa uban. Makapahinumdum sa kulokabildo sa duha ka higala nga nagkanayon, “Migo, mopatay ko og tawo tungod lang sa kwarta, apan tungod kay amigo man ‘ta, pwede ra tika patyon bisan wala’y bayad.”  Atala lagee!

“Trip to Jerusalem”

Miapelar ang Cebu City Anti-Mendicancy Office (CCAMO) ngadto kang Konsehal Pastor Alcover Jr., nga mopasiugd sa pag-umol og ordinansa nga magdilli sa pagkatulog sa mga publikong lugar.  Matud pa sa CCAMO, ang kakulang sa tukmang ordinansa maoy naghatag kalisod sa pagpatuman sa ilang mandato.  Komprehinsibo’ng solusyon ang kinahanglan sa pagsulbad sa komplikado’ng suliran sa mga vagrants sa dakbayan aron hingpit silang mahanaw sa kadalanan. Matud pa sa akong amigo, “Ang sulbad sa kagamhanan sa mga vagrants nahisama lang sa dula nga “Trip to Jerusalem” diin nagpunay lang og balhin-balhin ang mga vagrants sa ilang gipuy-an.”  Fezteleern!

Ipalit og red horse ang ayuda

Nahimutang pa sa alanganin ang P35 milyones nga subsidiya alang sa mga habal-habal drivers human ang konseho sa dakbayan sa Sugbo, atol sa ilang labing ulahing session, nakadiskobre nga naghinobra ang listahan sa mga benepisyaryo, ug sa dili usab klaro nga guidelines. Matud pa sa akong silingan, “Angayan nga susihon pag-ayo ang sistema pagpanghatag sa ayuda kay kasagaran sa gihatagan, inay ipalit og gasolina, gipalit na man hinoon og Red Horse.”  Pagkatoytoy!