Gugma nga nagkahupas

Dear Tito Miguel,

Ako diay John Niño, 27 anyos, nga taga Sogod, Cebu ug adunay uyab nga ginganlan og Charice. Lima na ka tuig na ang among relasyon, ug si Charice maoy klase sa babaye nga gipangandoy sa daghang lalaki. Buotan siya, masinabtanon, ug wala gyud koy ikasaway kaniya. Sa tinuod lang, wala gyud siyay nahimong sala nga makapasakit nako. Mao pud na ang hinungdan nga mas naglibog ko sa akong gibati karon.

Sa niaging mga bulan, nabantayan nako nga murag hinay-hinay nang nausab ang akong pagbati para kaniya. Dili man ingon nga wala nako nahigugma, apan murag dili na parehas kaniadto ang akong excitement kung magkita mi o mag-istorya. Usahay, mas gusto na lang nako nga mag-inusara kaysa makigkita kaniya. Ang mga butang nga makapalipay nako kaniadto, murag ordinaryo na lang karon.

Wala koy laing babae, ug wala pud koy laing gihigugma. Wala ko gikapoy sa among relasyon. Mao nga dili gyud nako masabtan nganong murag nagkahupas ang akong feelings kaniya.

Tito Miguel, normal ra ba nga mausab o mobugnaw ang pagbati human sa dugay nga relasyon? Unsa man ang akong buhaton aron dili mosamot og kahupas ang gugma nako kaniya? — John Niño

* * *

John Niño,

Basin wa gyud ka hingpit nga nahigugma kaniya sa primero pa lang. Lagmit naibog lang ka, apan nasaypan nimo nga nahigugma. Ideal woman man kaha siya. Usahay man gud tungod lang ka’y pasado siya sa imong standard, abi nimo mahigugma dayon ka. Timan-i, kasagaran nga mauyab o mapakaslan layo ra sa gipangandoy.

Dunay gusto’g puti o hamis, apan didto sa morena nabuang. Duna’y gusto’g taas, apan didto sa putot nalagpot. Basin mao na’y nahitabo kanimo, kay pasado man siya kanimo, abi nimo og nahigugma ka. Ang gugma baya wala’y rason. Dili ka kasabot ngano ang badlongon imo panggaon, apan ang tarong imo ra ilad-ilaron.

Kun nihupas man imong gibati kaniya, buot pasabot dili pa tantong lawom imong natugkad para niya. Wa man na nimo tuyoa di ba, natingala gani ka ngano mas ganahan ka mag-inusara kaysa magkuyog mong duha. Normal ra na nga mausab ang imong gibati. Mao bitaw nga dili modesisyon samtang suko, masulob-on o nalipay ka, ka’y lagmit magbasol ka. Tungod kay ang pagbati temporaryo ra, sunod adlaw mausab ra.

Ang nahitabo kanimo mao na’y gitawag nga falling out of love. Gani, duha duha pa kun na in love ba gyud ka niya. Busa wala ka’y angay buhaton aron kini mapugngan. Dili nimo mapugos nga magpabilin ang kainit sa imong gibati. Busa paniid sa imong kaugalingon, kun wala siya mora ba ka’g nakalingkawas o nalipay? Kun dili na ka mingawon niya, wala na’y rason aron ipadayon inyong relasyon. — Tito Miguel

Magpatambag ka? Ipada kang Tito Miguel: 0991-318-9366