Water testing, ipaagi nalang sa MCWD

CEBU, Philippines — Wala makasumite ang Cebu City Environment and Natural Resources Office (CCENRO) sa gipangayong technical evaluation, water quality testing ug flow rate analysis sa upat ka waterfalls sa siyudad karong tuiga tungod sa limitado ang pundo sa ilang buhatan.

Ang labaw sa CCENRO nga si Engr. Editha Peros nipahibalo ngadto kang Sangguniang Panlungsod Secretary Charisse L. Piramide nga ilang nadawat ang Resolution No. 17-4177-2026 nga naghangyo sa opisina sa pagsusi sa Mangyapyap Falls sa Barangay Paril, Kabang Falls sa Barangay Budlaan, Manggasang Falls sa Barangay Tagbao, ug Linut-od Falls sa Sitio Udlom, Barangay Taptap.

Gipasabot ni Peros  ang pundo ang CCENRO alang sa water sampling karong tuiga, para lang sa mga monitoring sites sa pagkolekta sa datos nga importante sa pagtandi sa kalidad sa tubig ug pagmonitor sa kahimtang sa palibot.

Dugang pa niya, ang water quality testing sa opisina gihimo pinaagi sa usa ka accredited third-party laboratory ubos sa Purchase Order No. 1235 nga naaprubahan pa niadtong Nobyembre 6, 2025.

Dili kini puydeng usbon ang naa sa kontrata kay masitar sila auditor  kung dili magtakdo ang laboratory billings sa naaprubahang purchase order.b  Apan gipasalig sa CCENRO nga ilang iapil ang upat ka waterfalls sa budget planning ug procurement proposal sunod tuig.

Atol sa sesyon sa konseho, nangayo og dugang kasayuran si Konsehal Francis Esparis sa CCENRO kung pila ang pundo nga gikinahanglan aron matuman ang maong proyekto, bisan pa man kung ang budget mahatag pa sa 2027.

Pero nisugyot sab si Konsehal Alvin Arcilla nga posible nga adunay mas sayon nga paagi aron masusi ang kalidad sa tubig sa upat ka waterfalls.

Ilang hangyuon ang Metropolitan Cebu Water District (MCWD) nga maoy mopahigayon sa technical evaluation, water quality testing ug flow rate analysis nga libre.

"We just get water sample ani nga different falls. Ihatud lang sa MCWD nga laboratory. I think it's for free, Mr. Chair. MCWD no charge for Cebu City Government," matud ni Arcilla. Ang sugyot ni Arcilla giaprubahan sa konseho. Mahinungdanon ang water quality testing sa mga waterfalls sa syudad aron nga masiguro nga limpyo, luwas, ug mapreserbar ang kinaiyahan ug dili kini makahatag og kadaot sa mga indibidwal nga mobisita sa maong mga lugar. —IBM BANAT NEWS