Duha patay, tulo angol sa aksidente

CEBU, Philippines — Duha ka lalaki ang namatay ug tulo ang naangol apil ang usa ka bata sa tulo ka buwag nga aksidente sa dalan nga nahitabo sa Camotes Islands, Argao ug Lapu-Lapu City gabii sa Hulyo 22.

Sa aksidente sa Poro, Camotes Island, namatay ang 36-anyos nga rider human nasampak sa puthaw nga poste ang iyang motor diha sa Sitio Kamandang, Barangay Teguis.

Ang biktima giila nga si Gerard Rey Bernaldez Bolo, taga Tagbilaran City, Bohol.

Base sa imbestigasyon sa kapulisan, nagmaneho si Bolo sa iyang Yamaha Mio Sporty padulong sa lungsod sa San Francisco sa dihang nawad-an siya og kontrol sa manobela ug nabanggaan ang usa ka puthaw nga poste sa daplin sa dalan.

Tungod sa kusog sa pagbangga nalabay siya sa karsada ug nakaangkon og grabeng samad sa ulo ug ubang bahin sa lawas. Patay na siya pag-abot sa Ricardo L. Maningo Memorial Hospital sa San Francisco.

Samtang sa laing insidente, usa usab ka 29-anyos nga lalaki ang namatay ug usa pa ang naangol human mibangga ang ilang Isuzu Bongo sa likod sa usa ka nakapark nga delivery truck sa National Highway, Barangay Tulic, Argao, Cebu, alas 10:30 sa gabii.

Ang namatay mao si Gene Ruel Anthony Sestoso, residente sa Alcoy, Cebu, samtang ang drayber sa van nga si Ruel Antonio Delos Santos Sestoso, 64, ug ang laing pasahero nga si Jomar Nieves, 30, gidala sa ospital.

Sa inisyal nga imbestigasyon, ang SinoTruck nga nag-unload og construction materials sukad pa sa buntag ug gi-park kini sa daplin sa national highway.

Gikatahong walay early warning device nga gibutang sa luyo sa trak ug wala usab gipasiga ang hazard lights, samtang ulan ug ngitngit ang maong lugar.

Tungod niini, wala mamatikdi sa drayber sa Isuzu Bongo ang  maong trak ug mibangga kini sa likod sa maong sakyanan.

Padayon pa ang imbestigasyon sa Poro Municipal Police Station ug Argao Municipal Police Station.

Sa laing aksidente, gipangita karon sa kapolisan ang drayber sa usa ka sakyanan nga mi hit-and-run sa duha ka mga bata sa Barangay Bankal, Dakbayan sa Lapu-Lapu.

Base sa post ni Lapu-Lapu City Lone District Representative Junard “Ahong” Chan sa social media niadtong Huwebes, Hulyo 23, nangayo og tabang ang inahan sa bata aron mailhan ang drayber nga midagan human sa insidente.

Matod pa ni Chan, ang drayber giingong misulod sa usa ka one-way nga dalan paingon sa Bankal duol sa usa ka pribadong tambalanan.

Gi-share ni Chan ang CCTV footage sa social media para makatabang sa pagpangita sa sakyanan ug sa pag-ila sa drayber nga nagmaneho ani anang orasa.

Sa video, makita ang duha ka batang lalaki nga naglingkod sa usa ka traffic sign nga nahimutang tapad sa konkretong barrier sa daplin sa dalan.

Kalit nga dunay usa ka dark colored nga SUV ang nibangga sa maong traffic sign diin galingkod ang duha ka bata.  Ang usa nga nag-atubang sa nagpadulong nga sakyanan daling nakadagan, pero ang mas bata nga kauban niyang gatalikod napunggit gyud kauban sa traffic sign ug maayo pagkalagpot og pipila ka metros.

Imbes nga mohunong aron tabangan ang iyang nadasmagan, mipaturatoy hinuon og padagan ang drayber sa maong SUV.

Gihangyo ni Chan ang publiko nga tabangan ang mga otoridad pag-ila sa drayber sa maong sakyanan.

Sa pagkakaron, ang bata padayon nga gitambalan sa Lapu-Lapu City Hospital. (BANAT NEWS)