Manager sa Korean grocery sikop sa entrapment operation

CEBU, Philippines — Nadakpan atol sa gilusad nga entrapment operation sa Criminal Investigation and Detection Group (CIDG) Mandaue City Field Unit ang manager sa usa ka Korean grocery store sa Barangay Luz, niining siyudad tungod sa giingong pagbaligya ug pag-apod-apod sa food products nga walay rehistro ug otorisasyon gikan sa Food and Drug Administration (FDA).

Ang nasikop mao si alyas "Lee", 32-anyos, manager sa usa ka Korean grocery nga nahimutang sa Pope John Paul Avenue, Barangay Luz, Dakbayan sa Sugbo.

Ang operasyon gipahigayon kagahapon sa hapon ubos sa pakigtambayayong sa CIDG Regional Special Operations Team (RSOT), Cebu City Police Office–City Tactical Operations Center (CTOC) ug FDA Regional Office VII.

Matud sa CIDG nga ang operasyon gilusad human sa  intelligence information nga nagbaligya ang maong establisemento og luncheon meat nga adunay Korean character labels ug Ma Ling Pork Luncheon Meat nga giingong walay balidong Certificate of Product Registration (CPR) ug dili awtorisado nga ibaligya o ipang-apod-apod sa Pilipinas.

Atol sa operasyon usa ka police operative ang nipalit sa maong mga produkto isip poseur-buyer.

Human nakompleto ang transaksiyon gidakop dayon ang suspetsado ug gipahibalo sa iyang mga katungod ubos sa konstitusyon.

Gikompirma usab sa FDA Regional Office VII nga ang mga produkto walay balidong Certificate of Product Registration ug sakop sa advisory nga nagpasidaan sa publiko batok sa pagpalit, pagbaligya ug pag-apod-apod niini.

Napakyas usab ang suspetsado sa pagpresenta og License to Operate (LTO), Certificate of Product Registration (CPR) o uban pa’ng dokumento nga nagtugot sa pagbaligya sa maong mga produkto.

Na-recover sa operasyon ang 211 ka kahon nga luncheon meat nga adunay Korean character labels ug 30 ka kahon sa Ma Ling Pork Luncheon Meat diin matag kahon adunay 24 ka lata.

Narecover usab ang buy-bust money nga naglangkob sa usa ka tinuod nga ?1,000 bill ug ?518,000 nga boodle money, lakip ang sales invoice nga gigamit sa transaksiyon.

Gibana-bana sa mga awtoridad nga nikabat ngadto sa ?700,000 ang kantidad sa tanang nakompiska nga mga produkto. Ang suspetsadp gidala diha sa CIDG Mandaue City Field Unit alang sa hustong dokumentasyon ug pagpasaka sa kasong kalapasan sa Section 11(a) sa Akta Republika. 9711 kun “Food and Drug Administration Act of 2009”.  — (BANAT NEWS)