Elasto Painters mipatilaw og pildi sa Fuel Masters

CEBU, Philippines — Ang Rain or Shine mikadlit sa una nilang daog sa impresibong paagi.

Kini human gitunolan sa Elasto Painters ang Phoenix Super LPG Fuel Masters sa una niining pildi, 105-98, sa PBA Season 50 Governors' Cup niadtong Martes, Hulyo 21, didto sa Ynares Center-Antipolo. Si Aaron Fuller miharos og 28 puntos ug 16 ka rebounds alang sa E-Painters nga mipakgang sa duha ka sagunson nilang pildi sa mga kamot sa Blackwater (108-131) ug Meralco (114-122).

Mihimo sab og kasikas si Adrian Nocum uban ang 18 puntos ingon man si Mike Malonzo bitbit ang 12 puntos alang sa E-Painters, nga sa usa ka higayon milabaw og 20 puntos.

Igo lamang nakasikit ang Fuel Masters ngadto sa usa lugas gumikan kay namawi dayon ang Rain or Shine aron pagpreserba sa siyete puntos nilang kadaogan.

Si Robert Johnson III mipupo og 27 puntos ug 11 ka rebounds apan sa way kapuslanan gumikan kay naputol ang tulo ang ka sunod-sunod nga daog sa Fuel Masters.

Sa laing bahin, ang Meralco Bolts nagsandig sa pagkamabaynihon nilang Chris Banchero ug Chris Newsome ug sa krusyal nga turnover sa Blackwater sa hilimatyong segundos aron pakagingon ang Bossing, 116-114.

Ang Blackwater milusad og mainit nga resbak human malubong og 18 puntos,92-110, sa nahibilin nga 7:35 sa duwa aron tablahon ang iskor, 114-114.

Duna pa gani unta silay tsansa nga ilogon ang labaw sa pinal nga 35 segundos apan nasipyat ang mga tira nilang

Sedrick Barefield ug Kentrell Barkley.

Human nakuha ni Banchero ang rebound, dali niyang gipasa ang bola ngadto ni Newsome, kansang fastbreak nakapa-abante sa Bolts og dos puntos sa pinal nga 3.9 segundos.

Duna pay katapusang higayon nga modaog o makapuwersa og overtime ang Blackwater apan nakahimo og dakong sayop si RK Ilagan dayong kapupos sa oras.

Bisa'g mi-iskor og usa ka palito lamang sa tibuok second half, si Antonio Hester maoy gihapon ang nangu sa Meralco uban ang 25 puntos ug 12 ka rebounds. Sila si Newsome ug Banchero mitali og 16 puntos matag usa alang sa Bolts, nga mikulit sa ikaduha nilang sagunson nga daog aron duyogan ang Blackwater sa ikaduhang dapit sa Group B bitbit ang managsamang 2-1 nga baraha.