58th, mapapanood na sa Cinemalaya

Mapapanood na sa Pilipinas ang award-winning animated documentary film ng GMA Public Affairs at GMA Pictures na 58th matapos nitong mapabilang sa lineup ng 2026 Cinemalaya Philippine Independent Film Festival.

Gaganapin ang screening ng 58th sa Aug. 13, 2026 (Thursday), 8:30 p.m., sa Shangri-La Plaza Red Carpet Premiere Theater at Cinema 1.

Ginugunita ng 58th ang Ma­guindanao Massacre na itinuturing na isa sa mga madugong trahed­yang hinarap ng journalists sa kasaysayan. Habang nagbibigay-pugay sa mga biktima, binibig­yang-diin ng pelikula ang hindi pa nareresolbang kaso ni Reynaldo “Bebot” Momay, na itinuturing na pang-58 na biktima.

Nagsisilbi rin itong final film performance ni late Ricky Davao na gumanap bilang Reynaldo Momay. Bibida sa pelikula si Glaiza de Castro, kasama sina Mikoy Morales, Marco Masa, Zyren Dela Cruz at Biboy Ramirez.

Nitong taon ay matagumpay na lumahok ang 58th sa ilang kilalang international film festival. Naging bahagi ang pelikula ng 2026 International Film Festival Rotterdam (IFFR), kung saan napili ito bilang isa sa Top 10 Audience Choice Films. Nagkaroon din ito ng screening sa 2026 Annecy International Animation Film Festival sa France sa ilalim ng Contrechamp Feature Films category. Lumahok din ito sa 2026 Doc Edge Festival ng New Zealand, kung saan nagwagi ito ng Facing the Edge Award.