Spain nagselebrar sa ilang kadaogan

CEBU, Philippines — Ang bag-ohay pang gikoronahang World Cup champions nga Spain nalingaw sa mabulokon nga kasaulogan sa ilang kadaogan nga misikad pinaagi sa usa ka parada didto sa kadalanan sa Madrid atubangan sa gibanabana nga duha ka milyon ka tawo kagahapong adlawa.

Atol sa masadya ug bibo kaayong programa nga gipahigayon sa Cibeles square, si  coach Luis de la Fuente ug ang tanang mga miyembro sa team tagsa-tagsa nga gipailaila samtang nagsul-ot og "We are champions" nga t-shirts.

"Spain showed the world what it is to work together, with one mind and one heart," matud pa ni pop superstar Shakira sa usa ka video message nga gipakita sa team ug sa mga nanan-aw.

Ang mga players ug staff nagpahulagway sa wala pa giisa og usab ni Rodri ang tropeyo sama sa iyang gibuhat niadtong Lunes human gipildi sa Spain ang Argentina 1-0 sa extra time didto sa New Jersey aron sila makoronahang kampiyon.

Ang strike ni Ferran Torres naghatud sa Spain sa ikaduha nilang World Cup, human sa makasaysayanon nilang kadaogan niadtong 2010.

"I've always said it, winning with your country is the most beautiful thing there is, above all a World Cup," dason pa ni Rodri. "This generation grew up watching (Iker) Casillas and (Andres) Iniesta lift the cup and that we can do it today is the biggest thing you can do in football." Sa ilang pagbalik sa Madrid gikan sa Amerika, ang mga players gidawat ni King Felipe VI ug sa tibuok royal family, ug dayon ni Spanish Prime Minister Pedro Sanchez sa wala pa miarangkada sa ilang parada.

"You have shown your grit, your resilience and your courage... combining head and heart," matud pa sa hari ngadto sa mga bitoon sa La Roja.

Gipulipulihan og alsa sa mga players ang tropeyo samtang malipayon nga miwara-wara sa ilang mga kamot agi'g pasalamat sa ilang mga fans nga midagsa sa kadalanan aron personal nga masud-ong ang ilang mga bayani.