Mamasura para palit og shabu
CEBU, Philippines — Usa ka 20-anyos nga mamasurahay ang gidakop human naaktohang nagdala og gidudahang shabu atol sa anti-illegal drug operation sa Sitio Lower Kawayan, Barangay Sambag 2, Cebu City, niadtong Sabado sa gabii, Hulyo 18.
Ang suspetsado nga gitago sa alyas nga “Dodong,” nadakpan alas 8:40 sa gabii atol sa Simultaneous Anti-Criminality and Law Enforcement Operations (SACLEO) nga gipahigayon sa Station Drug Enforcement Unit sa Abellana Police Station.
Sumala sa kapulisan, ang suspetsado taga-Barangay Calamba, Cebu City ug nalista isip street-level individual (SLI). Nakuhaan ang suspek og usa ka paketeng gidudahang shabu.
Sa interbyu, miangkon ang suspetsado nga ang halin sa makuha niyang basura ipalit niya og shabu.
Matud ni Abellana Police Station Officer-in-Charge Police Major Aris Tormo naa sa watchlist ang suspetsado tungod sa giingong balik-balik nga pagpangawat og mga electrical wire matag mamunit ni og basura.
Giawhag usab niya ang mga residente nga gamiton ang hotline sa estasyon kung naa silay gustong isumbong ug dili na kinahanglang motug-an sila sa ilang pangalan. (BANAT NEWS)
- Latest
