3 teroristang BIFF sugatan sa Maguindanao encounter
COTABATO CITY, Philippines — Tatlo sa mga nalalabing kasapi ng nabuwag na Bangsamoro Islamic Freedom Fighters (BIFF) ang sugatan matapos nilang atakihin ang mga sundalo sa isang detachment sanhi ng umaatikabong engkuwentro sa Talitay, Maguindanao del Norte nitong Linggo ng gabi.
Ang pag-atake, ay kasunod sa pag-detonate naman sa isang homemade bomb malapit sa armored combat vehicle na nakahimpil sa gilid ng Army outpost sa Barangay Linatang, Shariff Saydona Mustapha, Maguindanao de Sur, na inihagis ng dalawang BIFF members na nakilala sa mga pangalang Salik Enso Mungkas at Alimodin Amin Guiabar.
Sinabi ng mga opisyal ng Philippine Army 6th Infantry Division at ng Maguindanao del Norte Provincial Police Office sa mga mamamahayag na nasa 15 armadong terorista ang nagsigapang papalapit sa Army detachment ng 12 Mechanized Company sa Barangay Manggay, Talitay at nagpaulan ng bala.
Bunsod nito, agad nakipagpalitan ng putok ang mga sundalo sa detachment at napigil ang mga BIFF terrorists na tuluyang makalapit at makapasok sa kanilang lokasyon. Napilitan namang magsiatras ang mga terorista matapos masugatan ang tatlong kasamahan na sina Omar Modih Barinso, Odin Sangkay Batua at Andong Aliman Badrudin na kanilang binitbit sa pagtakas.
- Latest
