Barberong drug pusher nadakpan

CEBU, Philippines — Usa ka barbero nga high-value individual (HVI) ug iyang kauban ang nadakpan sa buy-bust operation nga gipahigayon sa mga operatiba sa San Francisco Municipal Police Station sa Sitio Po, Barangay Esperanza, San Francisco, Camotes Island, alas 2:30 sa hapon niadtong Sabado, Hulyo 18.

Ang mga suspetsado giila lamang sa ilang mga alyas nga "Jan-Jan," 28 anyos, usa ka barbero ug residente sa Sitio Po, Barangay Esperanza, ug "Joshua," 22 anyos, usa ka mananagat nga nagpuyo sa Sitio Mahayahay, Barangay Sonog, sa maong lungsod.

Atol sa operasyon, narekober gikan sa mga suspetsado ang kapin 35.80 gramos sa gidudahang shabu nga adunay gibanabang kantidad nga P263,840, ingon man usa ka .38 caliber revolver nga adunay duha ka buhing bala.

Padayon pa ang imbestigasyon sa kapulisan aron matino ang gigikanan sa mga ilegal nga droga ug posibleng koneksyon sa mga suspetsado sa ubang ilegal nga kalihokan sa maong lugar.

Ang duha ka suspetsado karon anaa na sa kustodiya sa San Francisco Municipal Police Station ug giandam na ang pagsang-at batok kanila og kaso sa paglapas sa Sections 5 ug 11, Article II sa Republic Act 9165 (Comprehensive Dangerous Drugs Act of 2002),ug Republic Act No. 10591, o ang Comprehensive Firearms and Ammunition Regulation Act. — /IBM (BANAT NEWS)