‘Soft clubbing’ nauuso sa Generation Y at Z
Nalalaos na ang nightclubbing. Sumagad na sa magdamagang inuman, yosi, sugal, at droga ang mga Baby Boomers, mga edad 70-80 na isinilang nu’ng 1946-1964. Sagad at nagiging senior age na rin ang mga Generation X, na isinilang nu’ng 1965-1980.
Nauuso ang “soft clubbing”. Ito ang bagong gimik ng mga Gen Y o Millennials, mga isinilang nu’ng 1981-1996. Gayundin sa mga Gen Z, mga isinilang nu’ng 1997-2012.
Nakatuon ang soft clubbing sa sosyalan, kalusugan, at kaayusan. Iniiwasan ang alcohol, droga, at pagpupuyat. Sinisikap ang pagtitipid at pag-iwas sa karangyaan. Importante ang pagsisimula at pagpapalalim ng mga relasyon. Walang away, puro lang saya.
Kadalasan nagsisimula ang soft clubbing bago magbukang-liwayway, alas-4 o 5 ng umaga. May disc jockey sa dance hall. Nagpapaupa ng murang ear pods batay sa nais na musika: K-pop, hiphop, rap. Tapos, kanya-kanya nang sayaw.
Masarap na kape lang ay talo-talo na. Sinasama ng mga Gen Y at Z ang mga magulang, lolo o lola na Baby Boomers at Gen X. Siyempre, ang musika sa ear pods nila ay disco, jazz, rock, soul, Manila sound. Todo sayaw din ang matatanda.
Alas-7 o 8 nagwawakas ang soft clubbing. Kasunod ay munting almusal at shower. O kaya, diretso na sa eskuwela, shop, o opisina.
Tumaas ng 478% ang coffee clubbing, ayon sa Eventbrite, pandaigdigang platform ng mga nag-o-organisa at sumasali sa concerts, parties, atbp happening. Tumindi rin ang sauna raves nang 256%, at morning dance parties ng 20%.
Iba na ang mundo dahil sa kabataan. Bago na ang kaugalian batay sa sitwasyon nila.
***
Makinig sa Sapol, Sabado, 8-10 ng umaga, DWIZ (882-AM).
- Latest
