Lalake nga namaligya og armas gidakop
CEBU, Philippines — Nadakpan sa mga operatiba sa Criminal Investigation and Detection Group (CIDG) Mandaue City Field Unit ang usa ka 40 anyos nga lalake atol sa buy-bust operation sa Barangay Can-asujan, Carcar City, Martes sa gabii, Hulyo 14, 2026.
Ang suspetsado giila nga si Reinario Rudela Abellanosa, residente sa Purok Conta, Barangay Can-asujan, Carcar City.
Sumala sa CIDG, ang operasyon kabahin sa "Oplan Paglalansag Omega" ug gihimo sa koordinasyon sa Carcar City Police Station aron batokan ang ilegal nga pagbaligya og mga pusil.
Nasikop ang suspetsado human siya mibaligya og usa ka .357 caliber revolver nga walay serial number ngadto sa usa ka police poseur-buyer.
Narekober usab sa operasyon ang lima ka buok bala sa .357 caliber, marked buy-bust money nga adunay tinuod nga P500 bill ug boodle money nga nagkantidad og P5,000, ug usa ka sling bag nga gigamit sudlanan sa pusil.
Dugang pa sa kapolisan nga napakyas ang suspetsado sa pagpakita og legal nga lisensya o permit sa pagpanag-iya ug pagbaligya og pusil ug mga bala.
Gidala ang suspetsado sa opisina sa CIDG Mandaue City Field Unit alang sa dokumentasyon ug pagsang-at sa kasong paglapas sa Section 32 sa Republic Act 10591 o ang Comprehensive Firearms and Ammunition Regulation Act. (BANAT NEWS)
- Latest
