Usa nalumos, duha naluwas

CEBU, Philippines — Usa ka 19-anyos nga batan-on ang namatay samtang duha pa ang naluwas gikan sa pagkalumos sa usa ka gidili nga pakaligoan nga bahin sa Fishport sa Barangay Inuburan, sa Dakbayan sa Naga, pasado alas-1:40 sa hapon niadtong Hulyo 11.

Ang namatay giila nga si alyas "Niel," residente sa Purok Acasia, Barangay Lipata, Minglanilla. Gidala siya sa Vicente Mendiola Center for Health and Infirmary apan gideklarang dead on arrival.

Ang duha ka kauban niyang naluwas mao sila si "Ge" 18 anyos, Grade 11 nga estudyante, ug si alyas "Ivan" 16 anyos, pulos residente sa Barangay Lipata, Minglanilla.

Base sa imbestigasyon sa Naga City Police Station, miadto ang tulo ug ilang mga barkada aron magtapok sa maong lugar ug mangaligo.

Human sa tingpaniudto, nakahukom silang mangaligo. Tungod kay mabaw ang unang ilang gikaligoan, mibalhin sila sa lawom nga bahin duol sa fish port.

Didto naay nakabuang nga  warning sign nga nagpasidaan nga gidili ang pag kaligo sa maong dapit, apan gikatahong wala nipatuo ang tulo ug nangadto gyud sa maong dapit.

Sunod nalang nila nakita ang tulo nga nagkapa-kapa ug padulong og kalumos. Sila si alyas "Ge"  ug "Ivan" maoy unang naluwas pinaagi sa tabang sa mga tawo sa lugar, pero si alyas "Niel" nitidlom sa ilawom ug naabtan pa og pila ka minutos ayha siya nakit-an ug nahaw-as gikan sa dagat.

Matud sa kapulisan, wala silay nakitang timailhan nga naay foul play sa nahitabo pero bisan pa ani girekomendar nila nga ipa-autopsy aron hingpit nga masuta ang hinungdan sa kamatayon.

Sa pagsuwat niing maong balita giingong luwas na ang duha ka mga biktima ug nakauli na sa ilang tagsa-tagsa ka panimalay. (BANAT NEWS)