Grade 4 pinainom ng pampurga ng guro, tigok!
TRECE MARTIRES CITY, Cavite , Philippines — Hustisya ang sigaw ng pamilya ng isang 8-anyos na Grade 4 pupil matapos painumin ng gamot na pampurga ng kanyang guro sa kanilang eskwelahan, dito sa lungsod, kamakalawa.
Kinilala ang nasawing mag-aaral na si Rex Mission, Grade 4 pupil ng Hugo Perez Elementary School Annex. at residente ng Hugo Perez, Trece Martires City, Cavite.
Ang deworming or purga ay isinasagawa upang matanggal ang bulate sa bituka ng tao.
Base sa panayam sa ina ng batang si Rex, Hulyo 2, 2026 nang magkaroon umano ng “libreng purga” sa eskwelahan na bahagi ng school deworming program.
Bagama’t pumirma sila sa waiver para sa naturang programa, nagtataka umano sila kung bakit ang mismong guro ang nagbigay ng gamot sa bata, gayong sa mga nakaraang taon ay ang mga magulang ang nagpapainom nito sa kanilang mga anak.
Pag-uwi umano ni Rex sa kanilang bahay ay agad na siyang dumaing ng matinding pananakit ng ulo at tiyan at paulit-ulit na pagsusuka.
Nang tanungin ng kanyang ina kung ano ang nangyari, sinabi umano ng bata na pinainom siya ng kanyang titser ng gamot na pampurga sa eskwelahan.
Mabilis ding tumaas ang lagnat ng biktima at nagdugo ang ilong nito. Kinabukasan, Hulyo 3, 2026, ay tuluyan nang binawian ng buhay ang bata.
Sinisisi naman ng ina ng bata ang gurong nagpainom ng gamot sa kanyang anak, dahil ayon sa kanya, batid umano nitong may iniindang karamdaman si Rex ngunit itinuloy pa rin nito ang pagpapainom ng gamot pampurga.
Nanawagan din ang pamilya Mission kina NBI Director Melvin Matibag at Public Attorney’s Office chief Persida V. Rueda-Acosta, na magsagawa ng imbestigasyon at maisailalim sa autopsy ang labi ng bata upang matukoy ang tunay sanhi ng pagkamatay nito at mapanagot ang mapapatunayang nagkasala..
- Latest
