Duha ka eskuylahan gihulga   

CEBU, Philippines — Dili na mopasaka og kriminal ug sibil nga kaso ang administrasyon sa Inayawan National High School (INHS) batok sa 13-anyos nilang kanhing estudyante nga miangkon nga siya ang mi-post sa online shooting threat batok sa eskwelahan.

Hinuon, gitugyan ang menor de edad ngadto sa Cebu City Social Welfare Services (SWS) aron ipaubos sa assessment, intervention ug rehabilitation subay sa naglungtad nga child protection laws ug mga protocol.

Sumala sa Cebu City Police Office (CCPO), gilusad ang imbestigasyon human mikaylap sa social media ang usa ka post nga naghulga sa pagpamusil batok sa mga magtutudlo ug mga opisyal sa Inayawan National High School.

Nailhan sa kapolisan ang tag-iya sa social media account ug giimbitar ang menor de edad ngadto sa Inayawan Police Station sa gabii sa Domingo, Hulyo 5, alang sa pormal nga interbyu.

Didto, iyang giangkon nga siya ang naghimo sa maong post ug personal nga gi-access ang social media account gamit iyang cellphone.

Matud ni Barangay Inayawan Gender and Development (GAD) Focal Officer Abraham Diaz, ang menor de edad usa ka residente sa Talisay City ug kanhing estudyante sa Inayawan National High School nga miskwela didto niadtong 2024.

Siya usab ang giingong tag-iya sa dummy Facebook account nga ginganlag “Andrea Kate,” nga maoy gigamit sa pagpahibawo sa hulga batok sa pipila ka mga magtutudlo ug sa principal sa eskwelahan niadtong Sabado sa gabii.

Dugang ni Diaz, atol sa inisyal nga interbyu miingon ang bata nga gadumot  siya sa iyang kanhing mga magtutudlo ug sa principal.

Apan, gipasabot ni Diaz nga wala’y armas ang menor de edad ug wala usab kini kapasidad sa pagbuhat sa iyang hulga.

Sumala sa CCPO, ang interbyu gihimo uban sa presensya sa inahan sa menor de edad, sa Barangay Inayawan GAD focal person ug sa assistant investigator sa Women and Children Protection Desk (WCPD) aron masiguro nga nasunod ang tanang legal nga panalipod alang sa usa ka bata nga nalambigit sa paglapas sa balaod.

Human sa imbestigasyon, mipadayag ang mga opisyal ug mga magtutudlo nga dili na sila mopadayon sa pagpasaka og kriminal ug sibil nga kaso batok sa menor de edad.

Busa, gitugyan ang bata ngadto sa Cebu City Social Welfare Services alang sa hustong assessment, intervention ug rehabilitation.

Matud pa usab ni Diaz, una kining gipailalom sa temporaryong kustodiya sa Barangay Inayawan GAD Office ug gilauman nga ipaubos sa intervention program alang sa mga Children in Conflict with the Law (CICL).

Una nang gipadayag ni Cebu City Councilor Dave Tumulak nga adunay magtutudlo nga mipasa ngadto sa mga awtoridad og screenshot sa usa ka social media post nga naghulga sa pagpamusil sa mga magtutudlo ug mga opisyal sulod sa kampus.

Ang mensahe dayag nga pagpanghulga batok sa mga magtutudlo, ilabina kadtong nagtudlo sa Grade 7 ug Grade 8, lakip ang principal sa eskwelahan.

Tungod niini, gi-report sa faculty sa Inayawan National High School ang insidente ngadto sa Inayawan Police Station.

Sa wala pa mailhi ang menor de edad, nangulo si CCPO City Director Police Colonel Ricky Sumalde sa usa ka coordination meeting uban sa mga opisyal sa Barangay Inayawan, principal sa Inayawan National High School, mga police commander ug ubang mga hingtungdan aron susihon ang kredibilidad sa report sa hulga ug mapalig-on ang koordinasyon tali sa kapolisan, barangay ug administrasyon sa eskwelahan.

Nagkasabot usab ang kapolisan, barangay ug mga opisyal sa eskwelahan nga palig-onon ang police visibility sa palibot sa kampus, pauswagon ang information sharing ug ipadayon ang suod nga inter-agency coordination aron matubag dayon ang posibleng mga hulga sa seguridad.

Matud pa sa CCPO, magpadayon kini sa pakigkoordinar sa mga opisyal sa eskwelahan ug lokal nga kagamhanan samtang gipadayon ang hugot nga security measures aron masiguro ang kaluwasan sa mga estudyante, magtutudlo ug ubang personnel sa Inayawan National High School.

Hulga sa Talisay

Sa laing bahin, gisuspenso sa Talisay City Government ang klase sa tanang pampublikong eskwelahan nga anaa sa usa ka school compound niadtong Lunes, Hulyo 6, isip lakang sa pagpanalipod sa mga estudyante ug magtutudlo human mitumaw ang hulga pinaagi sa social media.

Ang maong desisyon gipahibalo ni Talisay City Mayor Gerald Anthony "Samsam" Gullas Jr. human sa usa ka post sa Facebook nga naghulga og posible nga pagdala og pusil sulod sa eskwelahan.

Matud sa mayor, ang post gikan sa usa ka Facebook account nga naggamit sa ngalang "Zane Bacalso." Bisan pa og na-delete na kini, giseryuso nila ni tungod kay gihulga na ang ubang mga estudyante.

Tungod niini, nakigkoordinar dayon ang City Government sa Department of Education (DepEd) Talisay City Division ug sa kapolisan aron matimbang ang kahimtang ug masiguro ang seguridad sa palibot sa eskwelahan.

Giingon ni Gullas nga dili angay pasagdan ang maong matang sa post bisan pa og wala pa mapamatud-an ang katinuoran niini.

"These kinds of posts are never a joke and must always be treated as credible until proven otherwise," matud pa sa mayor.

Sa sinugdanan, ang suspensyon sa klase giapil lamang ang Talisay City Elementary School ug Talisay City National High School.

Apan sa ulahi, gilapdan kini aron maapil ang tanang eskwelahan nga anaa sa maong compound, lakip ang Central Elementary School, aron mas sayon ang paglihok sa mga pulis atol sa ilang operasyon.

"We will suspend all schools in the compound... Mas maka-lihok atong police if walay taw," matud ni Gullas sa laing Facebook post.

Nagpasidaan usab ang mayor sa mga tawo nga naghunahuna nga dili sila mailhan pinaagi sa paggamit og peke nga Facebook account.

"To anyone who thinks hiding behind a fake Facebook account makes you untouchable, ayaw mo'g salig nga lisod ka ma-trace," matud niya.

Gipasiugda ni Gullas nga seryoso ang gobyerno sa siyudad sa tanang hulga nga nagpunting sa mga eskwelahan, estudyante ug magtutudlo.

"The safety of our children will always come first, and those responsible will be held fully accountable under the law," dugang pa niya.

Samtang nagpadayon ang imbestigasyon, mihangyo ang mayor sa publiko nga motabang pinaagi sa paghatag og mga screenshot sa orihinal nga post, lakip ang mga komento ug reaksiyon niini, nga makatabang sa kapolisan sa ilang imbestigasyon.

Gibutyag usab ni Gullas nga nakuha na sa mga awtoridad ang screenshot sa listahan sa mga higala sa maong Facebook account isip kabahin sa ilang pagpangita sa tawo nga posibleng naghimo sa hulga.

Gihangyo usab niya ang mga tawo nga  nakaila sa nag-post nga makigtambayayong sa kapolisan pinaagi sa pagpahibalo sa ilang ginikanan, magtutudlo o sa mga awtoridad aron mapadali ang imbestigasyon. (BANAT NEWS)