Cebu City mogahin og incentive fund alang sa waste diversion program
CEBU, Philippines — Gikonsidera sa kagamhanan sa Dakbayan sa Sugbo ang paggahin og incentive fund aron mapalig-on ang waste diversion program sa siyudad isip kabahin sa pagpalambo sa solid waste management ug mapakunhod ang gidaghanon sa basura nga mahatud ngadto sa landfill.
Gisugyot ni Mayor Nestor Archival, Sr. ang paggahin og pundo gikan sa P50 milyones ngadto sa P100 milyones aron mahimong insentibo sa mga programa sama sa composting, recycling ug uban pa’ng pamaagi nga mamenosan ang basura padulong sa landfill. Alang sa mayor nga pinaagi sa maong lakang madasig ang mga Sugboanon ilabi na ang kabataan ug uban pa’ng sektor nga aktibong mosalmot sa waste diversion imbes nga ang dakong bahin sa pundo sa siyudad maggasto lang alang sa hauling ug tipping fee sa landfill.
Gipadayag ni Archival nga atol sa pakigtigom niya sa uban ang City Solid Waste Management Board ug mga representante sa mga pampublikong eskwelahan nasabotan nga dako ang mahimong papel sa mga tinun-an sa pagpakunhod sa basura sa siyudad.
Base sa datos nga iyang nakuha nga adunay kapin sa 135,000 ka tinun-an sa mga pampublikong eskwelahan sa siyudad nga mahimong kabahin sa programa nga gitawag og "Basura Namo, Kaugmaon Nato."
Ubos sa maong inisyatibo, dasigon ang mga tinun-an nga makigtambayayong sa ilang mga ginikanan sa hustong pagdumala sa basura sa ilang tagsa-tagsa ka mga panimalay.
Ang mga recyclable nga materials ilabay sa "garbage in a bottle" ug dad-on sa eskwelahan ug matag semana kolektahon kini. Nagplano usab ang siyudad ug ang mga eskwelahan sa paghimo og incentive scheme diin adunay madawat nga ganti ang mga tinun-an nga aktibong motampo sa programa.
Gipasabot ni Archival nga ang siyudad naggahin og P500 milyones matag tuig alang sa basura sa siyudad lakip ang hauling ug tipping fee sa landfill.
Matud ni Archival nga ibaligya ang recyclable materials nga makolekta nga makahatag og dugang nga benepisyo ug magpalig-on sa kahimtang sa solid waste management sa siyudad. — /BDB (BANAT NEWS)
- Latest
