Sugbo ikatulo sa dunay daghang nisalmot sa Pride Parade

CEBU, Philippines —  Misulod ang Sugbo isip ikatulong pinakadakong lugar nga adunay Pride celebration sa Pilipinas human makatigom og 20,088 ka rehistradong partisipante sa Grand Pride Parade niadtong Hunyo 27, sumala sa Cebu Pride Movement (CPM).

Matud ni CPM co-founder Ramon Matthew Basabe, ang gidaghanon gibase sa mga rehistradong partisipante gikan sa mga local government unit (LGU), pribadong institusyon, organisasyon ug indibidwal nga miapil sa parada.

"Cebu Grand Pride Parade with a total of 20,088 marchers. Out of the entire Philippines, we are number three highest attendees," matud pa ni Basabe. Busa, ang Sugbo nahimutang sa ikatulong puwesto sa pinakadagkong Pride gathering sa nasud, sunod sa Quezon City ug Isabela.

Liboan ka miyembro sa LGBTQIA+ community, ilang mga pamilya, kaalyado, estudyante, mga organisasyon sa katilingban, opisyal sa gobyerno ug ubang supporters ang miapil sa parada gikan sa Cebu Provincial Capitol padulong sa Plaza Independencia.

Si Gobernador Pamela Baricuatro maoy nangulo sa pagsugod sa parada sa Capitol compound, samtang gisugat ni Cebu City Mayor Nestor Archival ang mga partisipante pag-abot nila sa Plaza Independencia.

Nagpasalamat si Baricuatro sa dakong suporta nga gipakita sa mga nitambong gikan sa nagkalainlaing bahin sa lalawigan ug siyudad.

Matud usab ni CPM convenor ug co-founder Enrique San Juan, ilang gilauman nga mas motubo pa ang gidaghanon sa motambong sa umaabot nga mga tuig.

"We are looking at this to possibly grow next year, we can achieve that," matud ni San Juan.

Gipadayag usab niya nga 69 sa 81 ka barangay sa Cebu City ang miapil sa kalihokan karong tuiga.

Gawas sa Grand Pride Parade, gipahigayon usab ang ubang kalihokan isip kabahin sa selebrasyon sa Pride Month, lakip ang Run with Pride nga adunay 896 ka runners ug ang Big Pride Picnic nga gitambongan sa 2,662 ka partisipante.

Usa usab sa mga nahimong kabag-ohan atol sa Pride Month mao ang pagpirma ni Baricuatro sa Executive Order No. 29, Series of 2026, nga nagtukod sa Right to Care Program sa lalawigan.

Ubos sa maong executive order, mahimong mailhan ang gitudlong care partner aron makauban ug makabisita sa pasyente sa mga ospital ug health facilities sa probinsiya, makadawat og medical updates kon adunay pagtugot sa pasyente, ug makatabang sa pagproseso sa emergency assistance ug social welfare services, bisag dili minyo ang maong mga indibidwal. (BANAT NEWS)