Mayor Archival nagplano pagpalit og speed guns

CEBU, Philippines — Gikinahanglan ang dugang traffic enforcers ug modernong speed guns sa South Road Properties sa Dakbayan sa Sugbo aron mokunhod ang mga aksidente ug mapugngan ang overspeeding.

Matud pa ni Cebu City Mayor Nestor Archival nga nagpabilin ang SRP nga adunay pinakadaghan og natala nga aksidente diin base sa imbestigasyon nga kusog managan ang mga sakyanan ug motorsiklo ug adunay uban nga dili mosunod sa mga traffic signage.

Mao nga nirekomendar ang Traffic Management Coordination (TMC) nga magpatuman og dugang lakang aron luwas nga agianan ang SRP.

Tungod niini, nagplano ang mayor nga mopalit og speed guns karong Hulyo 2026.

Matud pa sa mayor, dakpon dayon ang mga motorista nga masakpan nga molapas sa speed limit sa higayon nga magamit na ang speed guns.

Dili kini ang unang higayon nga nisuway ang siyudad sa pagpalit og speed guns.

Niadtong 2022, ang Cebu City Transportation Office (CCTO) nagpagahin og ?1.5 milyon alang sa pagpalit og laser speed guns tungod kay dili na kasaligan ang ilang radar equipment.

Niadtong 2024, giduso na sab ni kanhi Konsehal Rey Gealon ang pagpalit sa speed guns ubos sa City Ordinance 801 ug sa Road Speed Limiter Act, apan wala gihapon kini naaprubahan.

Karon, si Archival na mismo ang nangunay aron mamoderno ang pagpatuman sa balaod sa trapiko.

Kung mapalit na ang speed guns, gilauman nga mokunhod ang mga aksidente ug mapalig-on ang disiplina sa mga motorista. (BANAT NEWS)