Traffic enforcer naangol human nadasmagi og SUV

CEBU, Philippines — Naangol ang usa ka traffic enforcer sa Cebu City Transportation Office human kini nadasmagi og SUV kagahapon samtang nagpahigayon sa iyang trabaho diha sa kadalanan atubangan sa Kapitolyo sa Barangay Capitol Site, niining siyudad.

Ang biktima mao si Jovanie Verano, 44-anyos kinsa nisuway sa pagpahunong sa maong SUV apan gikatahong ang maong sakyanan kusog kining niabante hinungdan nga nadasmagan ang biktima ug nalamba kini diha sa karsada ug nalatayan sa ligid ang wala’ng kamot niini.

Si Verano dali nga gitabang sa mga estambay diha sa lugar nga giila nga si Ariel Daan ug usa ka kauban niini kinsa nagdumili sa pagbutyag sa iyang pangalan.

Gikataho nga ang duha nakasaksi sa hitabo ug dali nga giapas ang SUV nga giingong nisuway sa pagpahilayo sa lugar.

Ang drayber sa SUV giila nga si Bartolome Robles Piol, usa ka retired engineer sa Dakbayan sa Toledo ug nianhi sa Dakbayan sa Sugbo tungod kay magkuha og dokumento.

Nangangkon si Piol nga gisunod niya ang mando dihang gipahunong siya ni Verano apan na-rattle siya dihang nidagan ang iyang sakyanan human niya nabuhian ang preno nga iyang gisigihan og tamak.

Ug wala sab niya napindot ang parking mode sa iyang Isuzu MUX nga sakyanan diin duha lang ang pedal nga iyang ginagamit tungod kay automatic ang maong sakyanan.

Wala usab niya napindot ang parking mode sa iyang Isuzu MUX nga sakyanan diin duha lang ang pedal nga iyang ginagamit tungod kay automatic ang maong sakyanan.

Gipaubos karon sa kustodiya sa Traffic Enforcement Unit ang maong drayber.

Samtang si Verano gidala diha sa Cebu Doctor’s Hospital sa Osmeña Boulevard, niining siyudad ug gipaubos og laboratory test.

Si Bise Mayor Tomas Osmeña nibisita kang Verano ug nitunol kini og tabang pinansiyal.

Si Osmeña nipasalig nga tabangan si Verano ug pasakaan og kaso ang drayber nga nakadasmag niini.

Kasamtangang gipadayon usab ang imbestigasyon sa nahitabong aksidente.

Gidayeg ni Osmeña ang duha ka estambay nga nitabang kang Verano ug gimandoan ang labaw sa CCTO nga si Raquel Arce nga kuhaon ang duha isip mga traffic enforcer isip pag-ila sa ilang kaisog ug pagtabang ngadto kang Verano ug gikatahong hatagan usab sila og bonus. (BANAT NEWS)