Greenhouse sa siyudad sa Mandaue himoong Parke

CEBU, Philippines — Himuon nga usa ka pampublikong parke ang kapin sa 3,000-square-meter nga luna duol sa usa ka mall sa Barangay Ibabao-Estancia, Mandaue City sulod ning tuiga.

Ang maong yuta iya sa Department of Agriculture (DA) ug sakop sa usa ka 35 ka tuig nga usufruct agreement tali sa DA ug sa Mandaue City Government.

Sa interbyu, si Councilor Joel Seno miingon nga ang kasabutan nagtugot sa siyudad nga ipatuman ang pagpalambo sa luna pinaagi sa laing entidad, basta ang proyekto nahiuyon sa katuyoan sa DA.

Matod ni Seno, usa ka pribadong developer ang mopatuman sa proyekto aron himuong publikong parke ang maong lugar.

Iyang gipadayag nga naa ang greenhouse sa maong propiedad dili gub-on kondili iapil sa disenyo sa parke aron mahimong mas matahum ug madanihon sa publiko.

“Gusto sa mayor nga adunay laing adtoan ang mga tawo,” matod ni Seno, nga nagpasabot sa tumong sa siyudad nga makahatag og dugang lugar alang sa pagpahayahay ug kalingawan sa mga residente.

Gidugang ni Seno nga ang pagpalambo sa maong 3,000-square-meter nga luna gilauman nga magsugod ug mahuman sulod ning tuiga.

“Mahimo kini nga usa ka matahum nga parke, hinaut,” dugang niya.

Wala pa gipadayag ni Seno ang kantidad sa badyet alang sa proyekto, apan iyang gipasalig nga ang parke mahimong bukas ug magamit sa tanang katawhan. (BANAT NEWS)