Rematch nilang Pacquiao ug Mayweather giuswag

CEBU, Philippines — Miabot og lima ka tuig ang negosasyon usa pa nahinayon ang unang away nilang Manny Pacquiao ug Floyd Mayweather niadtong 2016.

Ang resulta sa gibansagan nga "Fight of the Century" didto sa Las Vegas usa ka dekada na ang milabay wala mahiuyon sa gipaabot sa kadaghanan apan mikulit kini og rekord isip kinadak-an ugt labing dakog kita nga away sa kasaysayan sa boksing.

Sayo ning tuiga, migawas ang mga estorya kabahin sa MayPac 2 diin sa kadugayan si Pacquiao mianunsiyo gyud sa rematch nilang Maywether sa Septiembre 19 didto sa The Sphere sa Las Vegas.

Apan naputos dayon kini og kontrobersiya human nasayran sa mga fans nga ang legendary rock band nga Eagles naka-book na aron mag-concert sa susamang ug binyu.

Giusab dayon sa event promoter ang iskedyul sa Septiembre 25, ning higayona sa T-Mobile Arena.

Apan layo pa gihapon kini sa tinuod.

Mismo si Pacquiao ang mikompirma ngadto ni Lance Pugmire sa BoxingScene kagahapong adlawa nga ang giatngan nga rematch giuswag sa wala pa hisayring petsa tungod sa ligal nga mga isyu diin may kalambigitan ang Amerikanong boksidor.

Timaan niini, ang exhibition fight ni Mayweather batok ni Greek kickboxing star Mike Zambidis didto sa Athens, Greece karon untang Domingo, Hunyo 28, nakansela human ang CSI Sports, nga mikiha ni Mayweather kabahin sa giplano niining mga away batok nilang Pacquiao ug Mike Tyson, mikuha og injunction sa Southern District Court sa New York aron babagan ang away nilang Zambidis exhibition.

Ang abogado ni Mayweather nga si Melissa Glass mipadayag pinaagi sa usa ka suwat ngadto sa korte nga diili na nila ipadayon ang sangka nilang Mayweather ug Zambidis.

Ang CSI mikiha ni Mayweather sa miaging semana sa tinguha nga marekober ang dili mominus $4.65 million nga nabayad na sa konpanya ngadto ni Mayweather alang sa katungod pag-promote sa mga away batok nilang Tyson ug Pacquiao. Sa giatubang nga problema ni Mayweather, ang rematch nilang Pacquiao hanap pa sa dyes panas sa pagkakaron.