Edward Ligas nipiyansa sa kasong cyberlibel

CEBU, Philippines — Nakapiyansa na ang broadcaster nga si Edward Ligas human misulod sa korte ang mga kasong cyberlibel nga gisang-at batok kaniya sa kontratista nga si Jerome Awit.

Ang kaso naggumikan sa mga post ni Ligas sa social media nga nagsaway sa mga proyektong imprastraktura sa gobyerno sa Dakbayan sa Mandaue.

Sa usa ka pamahayag nga gipagawas miingon si Ligas nga gipahibalo siya nga gibalibaran ang iyang Motion for Reconsideration ug nga usa ka Information ang naduso na sa Regional Trial Court (RTC) Branch 65 sa Dakbayan sa Talisay.

Matod pa ni Ligas, nasayran niya niadtong Biyernes nga naa na sa lebel sa trial court ang kaso ug nga mahimong mogawas ang warrant of arrest bisan pa man sa plano nga dad-on ang maong kaso ngadto sa Department of Justice pinaagi sa usa ka Petition for Review.

Sumala sa rekord sa korte, gipagawas ang warrant of arrest batok kang Ligas alang sa tulo ka kaso sa cyberlibel. Gitakda ang piyansa nga P10,000 matag kaso o kinatibuk-ang P30,000.

Wala dakpa sa kapolisan si Ligas. Apan boluntaryo siyang misurender sa mga awtoridad sa wala pa mahatod kaniya ang mga warrant.

Nagsugod ang kaso gikan sa mga reklamo nga gisang-at ni Awit, tag-iya sa ZLREJ Trading and Construction Corp., tungod sa sunod-sunod nga mga post ni Ligas sa Facebook niadtong Agosto 2025.

Sa maong mga post, gikwestyon Ligas ang kalidad ug pagpatuman sa pipila ka mga proyektong imprastraktura nga gipondohan sa gobyerno lakip na ang riprap project sa Barangay Maguikay nga nahugno niadtong Oktubre 2024.

Giingon ni Awit nga sayop ug walay basihan ang mga alegasyon sa mga post nga naglambigit kaniya ug sa iyang kompanya sa korapsyon, paboritismo, sayop nga paggamit sa pondo sa gobyerno, ug depektibong mga proyekto sa publiko, nga nakadaot sa ilang reputasyon.

Niadtong Enero 2026, gibasura sa Cebu Provincial Prosecutor’s Office ang lima ka reklamo sa cyberlibel nga gisang-at ni Awit.

Apan, usa ka lahi nga reklamo ang mipadayon. Niadtong Abril 2026, nakakita ang mga piskal og probable cause ug mirekomendar sa pagsang-at og mga kaso sa cyberlibel batok kang Ligas.

Gibarogan ni Ligas nga ang iyang mga pamahayag kabahin sa iyang trabaho isip tigbalita ug komentarista nga naghisgot sa mga isyung adunay dakong interes sa publiko, ilabina ang accountability sa gobyerno ug mga proyektong imprastraktura. (BANAT NEWS)