Charo, bida sa animated fantasy series nga “Sun Chaser”

Ang award-winning actress nga si Charo Santos-Concio maoy usa sa mga nag-unang tingog sa modernong Pinoy animated fantasy series nga “Sun Chaser,” nga makita sa YouTube sugod karong Hunyo 23 alas-12 sa udto.

Giprodyus kini sa Toon City Animation ug Playlab, ug giisip nga usa ka dakong lakang alang sa industriya sa animation sa Pilipinas isip usa ka creator-owned series nga hingpit nga gimugna ug gihimo sa nasud.

Kauban ni Charo sa maong proyekto kay sila Manny Jacinto, Liza Soberano, Eugene Cordero, Dingdong Dantes, Zia Dantes, J.R. De Guzman, ug mga Star Magic artists nga sila AC Bonifacio ug KD Estrada.

Ang serye gimugna sa mga Pinoy animation talents nga sila Bobby Pontillas ug Bernard Badion. Si Pontillas nga nailhan isip beterano sa Disney Animation ug nahimong kabahin sa mga pelikula nga sama sa “Zootopia,” “Moana,” “Big Hero 6,” ug “Wreck-It Ralph.” Samtang si Badion nakahimo usab og mga proyekto alang sa dagkong studio sa Los Angeles lakip ang “Transformers: EarthSpark.”