Argao Aquathlon kasado na

CEBU, Philippines — Andam na ang tanan alang sa Adlaw sa Kublan-Argao Aquathlon nga gikatakda karong Septiembre 20 didto sa lungsod sa Argao, habagatang bahin sa Sugbo.

Si race director ug head organizer Scyll Gabriel Basirgo nagkanayon nga ilang ipahigayon kining maong kalihukan inabagan sa SugbuTri ug Argao Tourism Office aron pagdugang og kasadya sa selebrasyon sa tinuig nga pista sa lungsod agig pagyukbo sa minahal nilang patron nga nga si San Miguel Arkanghel.

"Our goal is to promote health and fitness, boost local tourism and economy, strengthen community engagement, support youth and grassroots sports development, and establish Argao as a major sports destination in the province," matud pa ni Basirgo.

Ang kulbahinam nga lumba naglangkob og novice aquathlon (250m swim ug 1K run), short distance aquathlon ( 500m swim ug 3K run), ug long distance aquathlon (1500m swim ug 5K run).

Aduna say nakalinya nga mga side events sama sa novice open water swim (500m), short distance open water swim (1500m), long distance open water swim (3,000m), ug ang 5K Fun Run.

Gawas sa mga tropeyo, ang overall champion sa male ug female division sa long distance aquathlon mobulsa og P10,000 nga ganting salapi samtang ang mopahiluna sa ikaduha ug ikaduhang dapit makadawat og P8,000 ug P5,000.

Ang nag-unang tulo ka mga mananaog sa short distance aquathlon mokubra og P8,000, P5,000, ug P3,000 nga premyo samtang ang Top 3 sa novice aquathlon mokabi og P5,000, P3,000, ug P1,500.

Si Basirgo nagkanayon nga naglaraw sila nga makahakot og kapin sa 200 ka mga partisipante nga ipakaylap sa nagkadaiyang mga age groups, gikan sa 8 Under ngadto sa 40-above.

Alang sa rehistrasyon ug dugang impormasyon, kadtong mga interesado mosalmot mahimong mobisita sa Adlaw sa Kublan-Argao Aquathlon Facebook page.