Ang garbo sa Badjao community

Kon hisgutan ang pulong nga "Badjao," subo nga ang mosantop dayon sa huna-huna sa kadaghanan mao ang imahe sa mga bata o hamtong nga nagpakilimos sa kadalanan ug nag-atang sa mga jeep aron mangayo og kwarta. Kini nga stereotyping dugay nang mibitik sa ilang komunidad ngadto sa kangitngit sa diskriminasyon.

Apan kagahapon, sa akong pagbisita sa Badjao Community sa Barangay Mambaling alang sa usa ka coverage, napamatod-an nako nga adunay mas gamhanan ug mas makadasig nga sugilanon—ang sugilanon sa kakugi, garbo, ug tinuod nga pagpaningkamot aron pag-usab sa dagan sa ilang kapalaran.

Nahimamat nako ang usa ka batan-on nga bag-o lang migradwar sa kolehiyo sa kursong Bachelor of Education isip usa ka Cum Laude gikan sa usa ka inilang unibersidad.

Imbes nga manimpalad sa laing dapit, mipili siya nga mobalik ug kasamtangang nagtudlo sa mga kabataan sa ilang mismong komunidad.

Usa pa ka maestra gikan sa samang dapit ang nakapaukay sa akong pagtagad. Gikan sa baybayon ug lapyahan sa Mambaling, nakaabot siya sa hawanan sa United Nations (UN) isip representante sa ilang katilingban.

Iyang gidala ug gipabati didto sa tibuok kalibutan ang tingog sa mga minority—ang singgit alang sa hugot nga suporta, pagdawat, ug ang hingpit nga pagtapos sa diskriminasyon.

Kini nagpamatuod nga hinay-hinay nang mikulit og kaugalingong pangalan ug dungog ang Badjao community. Dili na ingon nga mga makikilimos, kondili isip mga propesyonal ug ehemplo sa kalampusan.

Mismo ang mga lider ug miyembro sa tribo nagkanayon: gusto nilang ipakita sa kalibutan nga mas daghan kanila ang nangandoy nga molampos pinaagi sa singot ug kakugi, dili sa pagpangayo sa uban. Imbes nga ikauwaw, ilaha kining gipasigarbo kon unsa ug kinsa sila.

Ang ilang istorya usa ka dakong tamparos sa mga tawo nga dali rang mohukom base sa lang sa physical appearance.

Ang edukasyon ug saktong oportunidad mao ang yawe aron mabali ang ligid sa kakabos.

Angayan lamang nga ato silang ablihan sa atong mga bukton—dili pinaagi sa paghatag og sinsilyo sa karsada nga nag-aghat kanila sa pagpabilin didto, kondili pinaagi sa pagtahod ug paghatag kanila og patas nga luna sa katilingban.

Ang garbo sa Mambaling mao ang garbo sa tibuok Sugbo. Panahon na nga atong lantawon ang mga Badjao, dili sa ubos nga panan-aw, kondili isip isig ka-tawo nga aduna gihapoy katungod nga mokab-ot t sa ilang mga damgo.