Webmasters nakasagunson og tulo na ka kampiyonato
CEBU, Philippines — Gikan sa Moalboal ngadto sa Davao ug karon sa Surigao.
Ang University of Cebu (UC) Webmasters milangkat sa ikatulo nilang sagunson nga korona ning tuiga human sila naghari sa 78th Mabungahong Socorro Fiesta Basketball Tournament didto sa Socorro, Surigao del Norte niadtong Huybes, Hunyo 18.
Ang Webmasters nakaipsot sa kauban nilang Cebu team nga University of San Carlos (USC)-Dimes, 84-81, sa kulbahinam nilang sangka sa final nga miabot og overtime.
Si Maverick Eligoyo mipaulbo og 28 puntos apil ang lima ka 3-pointers, tulo niini iyang gitagak sa dugang singko minutos sa aksiyon nga nahimong yawi sa UC aron birahon ang gihandum nilang titulo.
Si Eligoyo mibira sab og lima ka rebounds ug usa ka block aron tabangan ang Webmasters pag-alsa sa ikatulo nilang sunod-sunod nga tropeyo sa kampiyonato human sa 1st Moalboal Commercial Fiesta Basketball League sa miaging duha ka bulan ug sa 89th Araw ng Dabaw Invitational Basketball Tournament didto sa dakbayan sa Davao niadtong Marso.
Ang Webmasters ni coach Atty. Kernn Sesante magsagubang sunod og mas lisud nga hagit sa Cebu Schools Athletic Foundation, Inc. (CESAFI) Season 26, nga gikatakdang mosikad karong Agosto.
- Latest
