Osmeña nibasol sa city administrator

CEBU, Philippines — Gibasol ni Bise Mayor Tomas Osmeña si City Administrator Albert Tan tungod sa kalangay sa pagpagawas sa sweldo alang sa  956 ka job order ug sa project-based workers nga nangalagad sa Cebu City Hall sukad pa niadtong Oktubre 2025 ug sa Enero hangtud sa Marso 2026.

Gipadayag ni Osmeña nga daghang empleyado ang wala na’y hapit makaon tungod sa kalangay sa paghatag sa sweldo sa JO nga taud-taod nang gituki sa konseho.

Si Osmeña niduso og resolusyon nga nag-awhag sa tanang JO ug project-based personnel gikan sa executive ug legislative department nga direkta nga moadto sa Office of the Vice Mayor aron isumite ang tanang dokumento kalabot sa ilang natanggong nga mga sweldo.

Gipasalig ni Osmeña nga personal niya nga tutokan ang mga reklamo sa apektadong mga empleyado aron masayran ang hinungdan sa kalangan sa pagproseso sa mga sweldo.

Si Osmeña nagkanayon nga adunay 15 ka JO workers sa iyang opisina nga padayon nga nagtrabaho bisan wala pa makadawat sa ilang sweldo.

Giangkon ni Osmeña nga ang iyang personal nga sweldo na lang ang iyang gihatag sa mga apektadong JO tungod kay dili kini makaako nga magtan-aw sa iyang mga empleyado nga padayon nga nagtrabaho nga gigutom. (BANAT NEWS)