Gipatay sa ka-meet up

CEBU, Philippines — Patay ang usa ka 25-anyos nga lalaki human gipusil sa usa ka wala mailhing tawo sa Sitio Laray 3, Barangay Buanoy, Balamban alas 11:45 sa gabii niadtong Hunyo 15, 2026.

Ang biktima giila lang sa alyas “Helbert” ug residente sa Sitio Bangbang, Barangay Nangka sa maong lungsod, gidala pa sa Cebu Provincial Hospital-Balamban apan gideklarang dead on arrival sa doktor nga miatiman kaniya.

Sumala sa Balamban Municipal Police Station, usa ka concerned citizen ang mitaho sa insidente ngadto sa kapolisan sa wala pa moabot ang tungang gabii.

Sa inisyal nga imbestigasyon, nasayran nga ang biktima ug ang iyang live-in partner nga ginganlang si Regine gikan sa ilang pinuy-anan ug paingon unta sa lubong sa lola sa babaye sa Sitio Sacsac, Barangay Abucayan.

Matud pa ni Regine, nanghulam sila og motorsiklo gikan sa ilang kaila aron makaadto sa lubong.

Apan sa ilang pagbiyahe, miingon ang biktima nga aduna pa siyay ihatod sa Barangay Buanoy sa dili pa sila mopadayon sa Barangay Abucayan.

Pag-abot nila sa Sitio Laray 3, Barangay Buanoy, nanaug  ang biktima ug gipabilin si Regine sa motorsiklo kay duna kini giadto sa unahan.

Pipila ka gutlo ang milabay, nakita ni Regine ang usa ka lalaki nga nagsul-ob og jacket ug pantalon nga miduol sa biktima ug diretso niining gipusil ang iyang kapuyo.

Human sa insidente, midagan ang suspek samtang nangayo og tabang si Regine sa mga residente sa lugar.

Sa follow-up nga imbestigasyon, adunay duha ka tawo nga giila sa kapolisan isip persons of interest sa maong kaso.

Padayon pa ang imbestigasyon sa kapolisan aron matino ang motibo sa krimen ug mailhan ang suspek. IBM BANAT NEWS