Visayas sub-grid nagpabiling ubos sa yellow ug red alert
CEBU, Philippines — Gikataho sa Department of Energy (DOE) nga ang Visayas sub-grid nagpabilin nga ubos sa yellow ug red alert nga kondisyon sukad niadtong Mayo 12, 2026, tungod sa daghang operasyon sa mga power plant nga nahunong ug nakaapekto sa sestema.
Atol sa virtual presscon niadtong Lunes, si DOE Undersecretary for Energy Policy and Power Industry Management Mario Marasigan nagkanayon nga daghang generating facilities ang wala gihapon nag-operate apil ang duha ka unit sa Giga Visayas Incorporated nga adunay hiniusang kapasidad nga 169 megawatts ug ang PEDC Unit 3 nga adunay 150 megawatts.
Gikataho nga karong buwan sa Hulyo niining tuiga ang target nga pag-ayo sa PEDC Unit 3.
Iyang gipasabot nga bisan adunay pipila ka kalamboan sa kondisyon sa sestema, sama sa pagkunhod sa oras nga ubos sa yellow alert ug pagmenos sa minimum load demand sa sestema nagpabilin gihapon nga gi-pressure ang grid tungod sa padayon nga mga outage. Gikompirma usab ni Marasigan nga ang Cebu-based Kepco-Salcon Power Corporation (KSPC) Unit 2 bag-o lang nasudlan na usab og forced outage mga alas 8:43 sa buntag niadtong Lunes tungod sa isyu sa monitoring.
Ang DOE padayon nga nakig-coordinate sa mga generation companies aron mapalig-on ang Visayas Grid samtang nagpadayon ang mga kalihokan sa pag-ayo.
Samtang, ang National Grid Corporation of the Philippines (NGCP) nipadayag sa ilang Hunyo 16, 2026 sa alas 8:00 sa buntag nga advisory nga ang Visayas Grid ubos sa yellow alert gikan alas 4:00 sa hapon hangtud sa alas 8:00 sa gabii.
Ang available capacity anaa sa 2,587 megawatts samtang ang peak demand niabot ngadto sa 2,384 megawatts nga nagbilin og nipis nga operating margin.
Nasayran nga 23 ka generating units ang naa sa forced outage o nagdagan sa ubos nga kapasidad nga niresulta sa 947.8 megawatts nga wala magamit sa grid.
Ang grid operator nagkanayon nga ang yellow alert natungha tungod sa kakulang sa dagkong Visayas baseload plants kauban ang taas nga forecast sa demand. BDB BANAT NEWS
- Latest
