TNT, Ginebra magtiwas

CEBU, Philippines — Tiwason sa defending champion TNT Tropang 5G ug Barangay Ginebra Gin Kings ang wala pa mahuman nilang isyu sa katapusang higayon sa Game 7 sa PBA Season 50 Commissioner’s Cup Finals

karong adlawa (Miyerkules, Hunyo 17) didto sa SM Mall of Asia Arena sa siyudad sa Pasay.

Mosikad ang tinagakay nilang duwa sa alas 7:30 sa gabii.

Ang Tropa nakaangkon pa og laing kinabuhi uban ang ang 98-90 nga kadaogan sa Game 6.

Tabla ang best-of-seven series sa baraha nga 3-3, lain na sab nga kulbahinam nga pinaksitay ang nagpaabot sa duha ka kampo ilabi na kay parehong wala nay ugma nga nagpaabot kanila sa ilang kampanya nga malangkat ang korona.

Si Chris McCullough, nga nagtinguha sa ikaduha niyang tropeyo sa PBA human gituboy ang San Miguel Beer ngadto sa kampiyonato sa Commissioner's Cup niadtong 2019, mao na sab ang mangu sa TNT nga naglaraw makasagunson og titulo.

Nagbarog sa ilang dalan mao ang eksplosibo sab nga import sa Ginebra nga si Justin Brownlee.

Human namugnaw sa miagi nilang duwa, si Ginebra coach Tim Cone masaligon nga ang lokal niyang mga bitoon, partikular na sila si RJ Abarrientos, Scottie Thompson, Japeth Aguilar, ug Stephen Holt, mopakita og maanindot nga salida sa tinagakay nga sangka.

“We're going to feel good about ourselves going into Game Seven. We know we can take this, and we're going to go for it,” matud pa ni Cone.

Sa pikas nga habig, ang TNT makasandig nilang Jordan Heading, RR Pogoy, Jayson Castro, Rey Nambatac, ug Glenn Khobuntin aron mosuporta ni C-Mac sa ilang misyon pagpanalipod sa ilang trono.