Splitter bag-ong coach sa Bulls

CEBU, Philippines — Si Tiago Splitter,  mga migiya sa Portland Trail Blazers ngadto sa NBA playoffs ning tuiga, gikuha isip bag-ong head coach sa Chicago Bulls.

Ang 41-anyos nga si Tiago nahimong labing unang Brazilian nga nakadaog og kampiyonato sa NBA uban sa San Antonio Spurs niadtong 2014. Apan miretiro siya isip usa ka player niadtong 2018 tungod sa injury sa iyang bat-ang.

Human niini, si Splitter nagsilbi nga assistant coach sud sa upat ka tuig sa Brooklyn Nets ug dayon sa Houston Rockets.

Gibira siyang coach sa Paris Basketball niadtong 2024 sa wala pa siya mobiya aron molingkod isip assistant sa Blazers.

Sa dihang si Portland head coach Chauncey Billups nadakpan niadtong Oktubre gumikan sa giingong kalambigitan niini sa usa ka sindikato sa iligal nga sugal, si Splitter gitudlo nga interim head coach sa Blazers.

Si Splitter mitimon sa Blazers ngadto sa 42-40 rekord hinungdan nga nakatikang sila sa playoffs ugaling lang kay gitagak sila sa Spurs sa unang hugna.

Samtang ang Bulls miposte lamang og 31-51 nga baraha sa miaging season ubos ni coach Billy Donovan ug wala makasud sa playoffs sa ikaupat ka sagunson nga tuig.

Mao kini ang rason nganong si Donovan mikanaog sa iyang puwesto.

Si Splitter mao nay mosagubang sa tahas pagpanday og balik sa Bulls, nga wala na makaabot sa playoffs sukad niadtong 2015 ug wala na makasakmit og titulo sukad niadtong 1998 sa dihang gipapangulohan pa sila ni NBA legend Michael Jordan.