Cebu City nipalig-on sa implementasyon sa AICS

CEBU, Philippines — Gipalig-on sa kagamhanan sa Dakbayan sa Sugbo ang implementasyon sa Assistance to Individuals in Crisis Situation (AICS) program pinaagi sa pagpirma ni Mayor Nestor Archival, Sr. sa Executive Order No. 76 nga nag-amendar ug nag-update sa Executive Order No. 20, Series of 2022 aron mas mapalambo ug ma-institutionalize ang mga giya sa paghatag og tabang sa mga indibidwal ug pamilyang Sugboanon nga anaa sa krisis.

Ubos sa bag-ong palisiya gipadayon sa siyudad ang paghatag og makatawhanong suporta alang sa mga sektor nga labing huyang sa katilingban ilabi na kadtong nahiagom og sakit, kamatayon, kalamidad, kakuwang sa pinansiyal, napahawa sa pinuy-anan ug uban pa’ng mga sitwasyon sa krisis. Ang mga giya nahiuyon usab sa Local Government Code of 1991 ug sa national framework sa Department of Social Welfare and Development (DSWD) alang sa AICS program.

Ubos sa EO No. 76, ang programa magpadayon sa paghatag og nagkadaiyang matang sa emergency assistance sama sa medical assistance, burial assistance, laboratory assistance, hospital billing assistance, food assistance, transportation assistance, educational assistance, disaster ug calamity assistance ug uban pa’ng matang sa tabang nga gitugot sa balaod. Nalakip usab sa EO ang kinatibuk-ang limitasyon sa pinansiyal nga ayuda nga hangtud sa ?10,000 matag benepisyaryo depende sa pundo ug sa mga balaod sa gobiyerno.

Apan alang sa mga talagsaon ug seryosong kahimtang sama sa nagkinahanglan og operasyon, dialysis, grabeng sakit, tabang sa paglubong sa kabus nga pamilya o mga biktima sa sunog, baha, linog, landslide ug uban pa’ng kalamidad mahimong motaas ang ayuda ngadto sa ?20,000, base sa rekomendasyon sa Department of Social Welfare Services (DSWS) ug pag-aproba sa mayor.

Aron masiguro ang transparency ug accountability, ang tanang aplikasyon alang sa AICS kinahanglan una nga ma-assess, ma-validate ug marekomenda sa mga awtorisadong social worker sa DSWS sa dili pa ipagawas ang bisan unsang tabang pinansiyal.

Kinahanglan usab nga adunay kompleto nga dokumento ug social case assessment nga nahiuyon sa mga regulasyon sa DSWS, DSWD ug Commission on Audit.

Gilimitahan sa bag-ong palisiya ang pag-avail sa tabang pinansiyal ngadto sa usa lang ka higayon matag unom ka bulan alang sa matag benepisyaryo.

Lakip usab sa mga bag-ong probisyon ang pagtukod sa usa ka centralized monitoring ug validation system sa DSWS aron malikayan ang doble nga pag-avail sa ayuda, ghost beneficiaries, overlapping assistance ug mga peke nga pagkuha sa ayuda nga mahimong hinungdan sa pag-abuso sa panudlanan sa kagamhanan. (BANAT NEWS)