Probinsiya nilusad sa Clean Toilet Stops Partnership Program

CEBU, Philippines — Opisyal nga gilusad sa kagamhanan sa Probinsiya sa Sugbo ang Clean Toilet Stops Partnership Program pinaagi sa paggama og memorandum of agreement (MOA) tali sa mga lokal nga kagamhanan ug pribadong establisamento kagahapon.

Ang programa gilusad diha sa usa ka mall sa General Maxilom Avenue niining siyudad diin nagtumong kini sa pagtukod og network sa limpiyo, luwas ug dali maabot nga mga comfort room alang sa mga turista ug mga biyahero nga naglibot sa lalawigan.

Matud sa hepe sa Provincial Tourism Office (PTO) Rowena Montecillo nga usa kini ka dakong lakang aron mapalambo pa ang serbisyo sa turismo ug masiguro nga positibo ang kasinatian sa mga bisita sa Sugbo.

Ang maong programa subay kini sa direktiba ni Gobernador Pamela Baricuatro nga palig-onon ang mga pasilidad nga nagsuporta sa industriya sa turismo.

Tumong sa Clean Toilet Stops Program ang paghimo og lalawiganong network sa mga establisamentong andam moserbisyo isip opisyal nga toilet stops sa mga lokal ug langyaw nga turista. Sa unang hugna sa proyekto, gitutokan una ang paghimo sa mga polisiya, giya ug mga sukaranan nga sundon sa mga partisipanteng establisamento.

Matud ni Baricuatro nga dili lang sa katahum sa mga destinasyon masukod ang turismo lakip niini ang kalidad sa serbisyo ug pasilidad nga mahatag ngadto sa mga bisita.

Sa pagkakaron, adunay 18 ka lokasyon nga gitakdang mahimong kabahin sa unang hugna sa Clean Toilet Stops Network.

Lakip niini ang mga pasilidad sa mga lungsod Oslob, Argao, Sibonga, Barili, Aloguinsan, Balamban, Daanbantayan, San Remigio, Carmen ug Compostela ug mga siyudad sa Cebu, Mandaue, Lapu-Lapu, Naga, Toledo ug Bogo.

Kasagaran sa toilet stops anaa sa mga gasolinahan samtang ang uban nahimutang sa mga pampublikong lugar nga gidumala sa lokal nga kagamhanan sama sa mga plaza ug merkado, ingon man sa pipila ka pribadong establisamento.  (BANAT NEWS)