3 minibus gidaro sa van

CEBU, Philippines — Tulo ka minibus nga naka-park ang nabanggaan sa usa ka tourist van sa Poblacion 3, Awayan, Dakbayan sa Carcar niadtong sayo sa buntag sa Hunyo 15, 2026.

Daling gidala sa tambalanan ang mga pasahero nga gituohang mga langyaw sakay sa tourist van, ilabi na ang front-seat passenger nga maoy nagrabehan sa maong aksidente.

Base sa inisyal nga imbestigasyon ug mga pamahayag sa mga saksi, giingong giduka ang driver sa tourist van samtang nagmaneho.

Tungod niini, nalapas siya sa iyang linya ug mibangga sa mini bus nga naka-park sa daplin sa dalan. Matud pa ni John Mark, usa sa mga nakasaksi sa hitabo, nabantayan sa mga drayber sa tulo ka mini bus ug sa dispatcher nga kusog ang dagan sa tourist van sa wala pa kini mibangga.

Padayon karon ang imbestigasyon sa Carcar City Police Station aron matino ang tinuod nga hinungdan sa nahitabo.

Samtang nagpadayon ang imbestigasyon, gipahimangno sa mga otoridad sa trapiko sa Carcar City ang mga motorista nga likayan ang pagmaneho kon gikapoy, giduka o anaa sa impluwensiya sa makahubog nga ilimnon.

Gidasig usab nila ang publiko nga dili magpataka og pakusog sa pagpadagan aron malikayan ang mga aksidente sa kadalanan. (BANAT NEWS)