Upat nadakpan sa drug bust   

CEBU, Philippines — Kapin 50.20 ka gramo sa gituohang shabu nga adunay gibanabanang kantidad nga P341,360 ang nakumpiskar sa kapolisan sa buy-bust operation nga misangpot sa pagdakop sa usa ka 35-anyos nga High-Value Individual (HVI) sa Barangay Suba, Cebu City niadtong sayo sa buntag sa Hunyo 14, 2026.

Ang suspetsado giila sa kapolisan nga si alyas “Carl,” 35-anyos, ug residente sa Barangay Pasil, Cebu City. Nadakpan siya alas 1:15 sa kadlawon sa Magsaysay Street, Barangay Suba.

Matud ni Police Captain Noah Labra Añana, officer-in-charge sa Sawang Calero Police Station, ang mga sakop sa Station Drug Enforcement Team nagpatuman og duha ka semana nga surveillance ug case buildup operation batok sa suspetsado sa wala pa gilunsad ang buy-bust operation.

Giingon ni Añana nga ang operasyon, nga gihimo sa Station Drug Enforcement Team uban sa koordinasyon sa Philippine Drug Enforcement Agency-7 (PDEA-7), misangpot sa pagdakop sa suspetsado.

Nasakmit sa mga awtoridad ang mga pinaketeng gidudahang shabu moabot og 50.20 ka gramo.

Matud pa ni Añana, giimbestigahan pa kung asa ang tinubdan sa mga nakumpiskang ilegal nga droga.

Sa laing bahin, tulo ka mga lalaki ang nadakpan sa buybust operation ug pagronda sa usa ka drug den diha sa Sitio Brupa, Barangay Sambag II, Cebu City kagahapon sayo sa buntag.

Ang nadakpan sa sulod sa drug den mao silang Romeo Donaire, 26; Art Llyod Sacal Mayol, 34;  ug Reynel Alueta Bandalan, 28, nakuha gikan sa mga suspek ang 15 gramong gidudahang shabu nga nagkantidad og P102,000 ug mga drug paraphernalia.

Ang operasyon gilusad sa mga sakop sa Philippine Drug Enforcement Agency (PDEA) Region 7 human sila nakadawat og impormasyon bahin sa maong drug den nga gipadagan sa usa ka alyas “Jan-Jan” kinsa nakaikyas.

Ang mga dinakpan pasakaan og kasong paglapas sa Comprehensive Dangerous Drugs Act of 2002. (BANAT NEWS)