Natagak nitugpa sa pumpboat patay

CEBU, Philippines — Usa ka patay nga babaye ang napalgan sa usa ka gamay nga pumpboat diha sa tiilan nga bahin sa ilawom sa Mandaue -Mactan Bridge sa Sitio Bantayan sa Hari, barangay Looc, sa Dakbayan sa Mandaue kagahapon sa kadlawon.

Ang maong babaye gibana-banang 20 ngadto sa 30 anyos nagsul-ob og puwa nga t-shirt ug gray nga shorts.

Sumala pa sa kapolisan usa ka residente sa lugar nga si Jao Andrew Heyrosa nangihi anang tungora sa dihang nakadungog kini og haguros gikan sa taytayan nga susama og naay nahagbong.

Sunod ani ang paglagubo sa gamay nga pumpboat nga giparking sa lugar ug sa ilang pagsusi, nasuta nga usa kini ka babaye.

Dali silang nitawag sa barangay ug ang mga sakop sa City Disaster Risk Reduction Management Office responders pinangulohan ni Sydney Santos daling nisusi sa maong babaye.

Gidala nila dayun ni sa Mandaue City District Hospital apan ang niatiman nga doctor mideklarar kaniya nga dead on arrival (DOA).

Padayun pa karon ang imbestigasyon sa kapolisan bahin sa maong hitabo ug pag-ila sa maong babaye. Sa pagkakaron gidudahan nga tuyo kining nilayat gikan sa maong taytayan. — IBM