Senior citizen gitigbas sa silingan samtang naglingkod

CEBU, Philippines — Usa ka 72-anyos nga lalaki ang naangol human giingong giatake ug gitigbas og sundang sa iyang silingan sa Sitio Kayapokyapokan, Barangay Manlapay, Lungsod sa Dalaguete niadtong Sabado sa hapon.

Ang biktima giila nga si Felipe Dela Torre Salariana, Sr., residente sa maong lugar.

Base sa imbestigasyon sa kapolisan sa wala pa nahitabo ang pagpanigbas naglingkod ang biktima diha sa pultahan sa iyang balay diin kalit nga niabot ang suspetsado nga si Enrico Lagarde Sereño, 55-anyos ug giingong niatake ngadto sa biktima ug gitigbas niini ang naulahi gamit ang sundang.

Ang biktima nakaangkon og samad tinigbasan sa liog daling gidala sa iyang anak ngadto sa Mantalongon Rural Health Unit.

Apan tungod kay grabe ang naangkon niining samad tinigbasan gibalhin ang biktima ngadto sa Isidro Kintanar District Hospital alang sa dugang pag-atiman.

Nadawat sa Dalaguete Police Station ang report alas 6:00 sa gabii sa maong adlaw pinaagi sa usa ka mensahe sa messenger.

Atol sa pagresponde sa mga polis sa maong hitabo nadakpan nila ang suspetsado ug na-recover ang sundang nga adunay gitas-on nga 16 ka pulgada nga adunay mantsa sa dugo ug ang sakoban niini.

Matud sa kapolisan giingong ang suspetsadp nakasuhan na kaniadto diin gikataho nga nakasinati kini og mental depression.

Padayon karon ang imbestigasyon sa kapolisan aron matino ang motibo sa maong pagpangatake. — /BDB (BANAT NEWS)