Yannie nakadaog sa TNT

Gikoronahan si Yannie Basical sa Region 3 isip grand champion sa “Tawag ng Tanghalan” Season 10 human nakaab-ot niini ang labing taas nga iskor nga 97.4 porsyento gikan sa mga hurado atol sa grand finals nga gipahigayon niadtong Sabado, Hunyo 13. Nikulit usab siya og kasaysayan isip unang kampiyon sa kompetisyon nga dunay autism spectrum.

Gitapos ni Yannie ang kompetisyon pinaagi sa usa ka Smokey Mountain medley nga nakahatag og standing ovation gikan sa mga hurado ug mga tumatan-aw. Sa unang hugna sa pasundayag, nakapahilak ug nakapaantig usab siya sa mga hurado pinaagi sa emosyonal niyang pag-awit sa “Wakas” sa SB19.

Napildi ni Yannie sa three-way grand finals showdown sila Charlie Palalisan, nga nahimong second placer uban sa 97.1 porsyentong iskor, ug Jeanel Silvestre, nga nahimutang sa ikatulong dapit human makakuha og 95.1 porsyento..

Naglingkod isip mga hurado sa “Tawag ng Tanghalan 10: Ang Huling Tapatan” sila Darren Espanto, Erik Santos, Yeng Constantino, Klarisse de Guzman, Jed Madela, Marielle Montellano, Nyoy Volante, Bituin Escalante, Jonathan Manalo, Kyla, JM Yosures, ug Ogie Alcasid.