Suspek gipusil sa testigo

CEBU, Philippines —  Nadakpan sa mga pulis ang usa ka 40-anyos nga lalaki human sa hot pursuit operation human niya gikatahong gipusil ang usa ka lalaki sa Barangay Canbanua, Argao, Cebu niadtong Biyernes sa gabii, Hunyo 12, 2026.

Ang biktima nga giila sa alyas “Jay” nasamdan sa pagpamusil ug naigo sa tiyan ug paa. Nahitabo ang insidente mga alas 7 sa gabii. Sumala sa Argao Municipal Police Station, niresponde ang mga pulis human sa report sa pagpabuto og armas sa lugar.

Pag-abot nila, nakit-an ang biktima nga naghigda ug nagdugo maong gidala nila ni sa tambalanan.

Didto sa tambalanan gitug-anan sa biktima ang mga polis kung kinsa ang nagpusil kaniya. Ang suspek mao si alyas “Felip,” 40, ug residente sa Barangay Talaga, Argao.

Tungod ana, gilusad dayon sa kapulisan ang hot pursuit operation nga misangpot sa pagkasikop sa suspek sa Barangay Talaga pipila ka oras human sa insidente ug gidala ang suspek sa ospital.

Ug didto gikumpirmar sa biktima nga siya ang mipusil kaniya. Sa imbestigasyon sa kapulisan  giingon nga posibleng personal nga panagbangi ang motibo sa insidente kay naa nay bikil ang duha sa una.

Ang suspek witness kaniadto sa kasong pagpangawat batok sa biktima, samtang ang pamilya sa suspek mi-file usab og reklamo batok sa biktima.

Pasakaan karon og kaso nga frustrated murder ang suspek.