Napunggit sa motor patay
CEBU, Philippines — Patay ang usa ka 30-anyos nga lalaki human nabanggaan sa motorsiklo samtang kini nitabok sa dalan sa F. Cabahug Street atubangan sa usa ka hotel sa Barangay Kasambagan sayo sa buntag niadtong Sabado, Hunyo 13, 2026.
Ang biktima giila nga si Jimmy Lumapac Jaducana, residente sa maong barangay.
Sa imbestigasyon sa Traffic Enforcement Unit sa Cebu City Police Office (CCPO), nahitabo ang insidente mga alas-3:50 sa kaadlawon samtang mitabok sa karsada ang biktima gikan sa usa ka convenience store.
Nasayran nga nagdagan ang motorsiklo gikan sa direksyon sa Lahug padulong sa F. Cabahug Street nga gimaneho ni Mc Vaughn Morata Polancos, 24 anyos, uban sa iyang angkas nga si Kaye Fernandez Estremos, 23 anyos, dihang nabanggaan niini ang biktima.
Tungod sa kakusog sa impact, nalabay ang biktima ngadto sa sementadong dalan ug nakaangkon og grabeng samad sa ulo ug ubang bahin sa lawas.
Gidali pagdala sa mga responders si Jaducana ngadto sa Cebu City Medical Center apan gideklarar siyang dead on arrival.
Samtang, naangol usab ang drayber sa motorsiklo ug ang iyang angkas human sila malabay gikan sa ilang gisakyan.
Si Polancos karon anaa sa kustodiya sa Traffic Enforcement Unit ug nag-atubang og kasong reckless imprudence resulting in homicide. (BANAT NEWS)
- Latest
