Naglabay og basura gipamulta

CEBU, Philippines —  Mihangyo si Mandaue City Mayor Thadeo Jovito “Jonkie” Ouano sa mga residente nga magtinabangay sa pagmentinar sa kalimpyo sa dakbayan ug likayan ang dili hustong paglabay sa basura.

Gihimo ni Ouano ang panawagan human nadakpan ang usa ka lalaki nga naglabay og basura sa suba duol sa A. Soriano Barangay Centro Bridge niadtong Lunes, Hunyo 8, 2026.

Sa pakighinabi sa mga tigbalita, giingon ni Ouano nga gipatawag na ang maong lalaki nga  naglabay sa basura ngadto sa maong agianan sa tubig.

Atol sa ilang panagtagbo, nasayran sa siyudad nga ang lalaki usa ka laborer nga nagtrabaho alang sa usa ka vendor sa Mandaue City Public Market ug gisugo lamang sa paglabay sa basura. Giingong tulo ka sakong basura ang gilabay sa maong lalaki.

Matud pa ni Ouano, gipahamtangan og silot ang maong tawo tungod sa paglapas ug gipatawag usab sa Mandaue City Environment and Natural Resources Office (MCENRO).

“Gipabayad nato og P5,000 nga fine and nibayad gyud sila,” matud ni Ouano.

Human sa insidente, gisubli ni Ouano ang iyang pag-awhag sa mga residente nga mahimong responsable ug motabang sa pag-atiman sa kalimpyo ug kahapsay sa dakbayan.

“Ako gyud ning gibalik-balik pirme sa atong mga kaigsuonan sa City of Mandaue, mamalihug lang ko, muhangyo ko ninyo tagsa-tagsa nga magtinabangay tang tanan,” matud niya.

Giangkon sa mayor nga dili kaya sa kagamhanan nga sila lang ang magmentinar sa kalimpyo ug kahapsay sa dakbayan maong mahinungdanon ang kooperasyon sa mga residente.

 “Ganahan ta malimpyo atong syudad pero kung di ta mag tinabangay dili nato badlungon atong mga silingan, atong mga anak, nga naa man tay saktong basurahan nga adto lang ilabay, kita ra sad ang ma affected,” pagmahay sa mayor.

“Ari ra ba dayon ta kusug mureklamo sa social media,” dugang pa niya.

Giingon ni Ouano nga dili lamang paglabay sa basura ang problema sa dakbayan apan apil usab ang vandalism ug mga paglapas sa balaod-trapiko, nga iyang giingong naggikan sa kakulang sa disiplina sa komunidad.

 “Mao lang na atoa ganahan mi og tabang sa tanan, to all of us to be involved because this. (BANAT NEWS)