Export ban sa Philippine blue crab gikabalaka

CEBU, Philippines —  Duha ka dagkong stakeholder sa industriya sa seafood sa Pilipinas nanawagan sa gobyerno nga molihok dayon human gipahamtang sa Estados Unidos ang pagdili sa pag-import sa Philippine Blue Swimming Crab (BSC), nga nagpasidaan sa dako nga kapildihan sa ekonomiya ug epekto sa panginabuhian.

Sa managlahing position papers nga gipagawas niadtong Mayo 2026, ang Phil-Union Frozen Foods, Inc. (PUFFI) ug ang Philippine Association of Crab Processors Inc. (PACPI) mihangyo sa mga ahensya sa gobyerno nga sulbaron ang mga kakulangan sa compliance nga giila sa U.S. National Marine Fisheries Service (NMFS) ubos sa Marine Mammal Protection Act (MMPA).

Matud sa NMFS, ang Philippine BSC fisheries nga giila isip Fishery IDs 2129 ug 2130 wala nakatuman sa standards sa U.S. tungod sa kakulang sa dokumentasyon sa marine mammal bycatch monitoring, reporting sa kadaot ug kamatayon sa marine mammals, ug ebidensya sa kaepektibo sa mitigation measures, nga maoy hinungdan sa pagdili sa export.

Suma ni PUFFI President Kunho Choi nga ang isyu walay kalabotan sa kaluwasan sa pagkaon o kalidad sa produkto kondili sa regulatory compliance ug dokumentasyon.

Ang ubang nasud sama sa Vietnam, Indonesia, ug Sri Lanka nakapadayon sa ilang access sa U.S. market human nakatuman sa parehas nga requirements.

Gi-report sa PUFFI ang pagkunhod sa operasyon sa pagproseso, pagkansela sa export orders, pagminus sa pagpalit og hilaw nga materyales gikan sa lokal nga mangingisda, ug pagkawala sa trabaho sa tibuok supply chain.

Bisan pa niini, nagpadayon gihapon ang operasyon sa kompaniya ug nag-eksport og ubang seafood products ngadto sa non-U.S. markets.

Gihulagway usab sa PACPI ang merkado sa Estados Unidos nga “dili mapulihan,” ug miingon nga kapin sa 2,400 metric tons nga crab meat nga nagkantidad og sobra $50 milyon ang gi-eksport sa 2025, diin mga 90 porsiyento sa BSC exports sa Pilipinas padulong sa U.S. Nagpasidaan ang grupo nga ang pagdili nakahatag na og pagkansela sa mga order, pagkunhod sa operasyon, ug epekto sa panginabuhian sa komunidad sa mangingisda, ug posibleng maghatag og higayon sa ubang nasud nga mopuli sa merkado sa Pilipinas.

Ang duha ka organisasyon nanawagan sa pagpalig-on sa mga sistema sa monitoring sa marine mammal bycatch, pagpaayo sa reporting system, pagpalapad sa siyentipikong datos, ug mas lig-on nga koordinasyon tali sa gobyerno, industriya, ug mga stakeholder.